محسن نقوی تون بیک ڈور چینل حوال ارے، میڈیا ٹی پاننگ کپنہ،بیرسٹرگوہر

اسلام آباد، چیئرمین پی ٹی آئی بیرسٹر گوہر پارلیمنٹ ہاؤس اٹی میڈیا تون ہیت وگپ کرسا پارینے کہ 27 ستمبر نا برانز نا کماشی ءِ وزیراعلیٰ سہیل آفریدی کیک، لانگ مارچ ءِ پد بٹنگ نا بابت ننا حکومت تون ہچ ءُ ہیت اس متنے۔ بیرسٹر گوہر پارے کہ برانز بیرہ پی ٹی آئی نا تنیا فیصلہ اف بلکہ دا کل جماعت آتا سلاہ اٹ کننگانے، 27 ستمبر نا برانز اٹی کل سیاسی جماعت آک بشخ ہلیرہ۔ بیرسٹر گوہر پارے کہ وزیر داخلہ محسن نقوی تون بیک ڈور چینل حوال ارے‘ اونا سرجم آتے میڈیا ٹی پاننگ کپنہ، حکومت تون ننا حوال مرسا کرینے ہرافتے ہچ گہس ڈکنگ تنے۔ چیئرمین پی ٹی آئی بیرسٹر گوہر پارے کہ بانی پی ٹی آئی مدام مذاکرات آتے اولیت تسنے، بانی پی ٹی آئی ہیت و گپ کننگ نا واکداری ءِ محمود اچکزئی و علامہ ناصر عباس ءِ تسنے۔ ننا مذاکرات نا سلہہ ءِ نزوری تکنگا، ساڑی حالیت اٹی حکومت تون ہچ وڑ انا مذاکرات مفننگ اٹی ءُ۔ او پارے کہ وزیراعظم نا چٹھی نا رسینگ جوان ءُ ہیت اسے، اپوزیشن لیڈر نا کنڈ آن چٹھی آ کوآرڈینیشن کننگ انگ ءِ‘ عدالتی پرمان تیان پد ہم 10 تُو آن ننا بانی پی ٹی آئی تون اوڑدہی متنے۔ ایلو کنڈ آ چیف الیکشن کمشنر و الیکشن کمیشن نا اِرا باسک آتا تقرری نا باندات آ حکومت و اپوزیشن نا نیام اٹی سلابتی عمل ترند مسنے۔ اپوزیشن لیڈر محمود خان اچکزئی وزیراعظم شہباز شریف تون اوڑدہی و سلاہ کنگ کن وخت خواہسنے۔ حوالی تا رِد اٹ وزیراعظم نا کنڈ آن بروک آ چٹھی نا اپوزیشن لیڈر محمود خان اچکزئی اسہ دے اٹی ورندی ءِ تس۔ حوالی نا رد اٹ محمود خان اچکزئی وزیراعظم تون اوڑدہی کن جوان دے و وخت اس پن کننگ نا خواست کرینے۔ حوالی تا رِد اٹ اپوزیشن لیڈر وزیراعظم نا چٹھی نا ورندی ءِ اپوزیشن راہشون تتون سلاہ کننگ آن پد تس‘ حکومت و اپوزیشن نا نیام اٹی چیف الیکشن کمشنر و الیکشن کمیشن نا اِرا باسک آتا تقرری نا باندات آ رابطہ غاتیٹی ترندی ءِ اہم ءُ پیش رفت اس گوندنگ انگ ءِ۔ ساڑی چیف الیکشن کمشنر سکندر سلطان راجہ و الیکشن کمیشن نا اِرا باسک آتا مدّت جنوری 2025ء ٹی پورو مسوسس، وخت اس کہ پوسکن آ تقرری کن حکومت و اپوزیشن سلاہ کننگ اٹی ءُ۔