پاکستان، آئی ایم ایف جاچ مذاکرات 23 ستمبر آن بنا مننگ نا گمان

اسلام آباد، پاکستان و جہانی مالیاتی فنڈ انا نیام اٹ بروک آ جاچ مذاکرات نا تیاریک بنا کننگانو، آئی ایم ایف نا ڈَل ہندا تُو پاکستان نا دورہ ءِ کیک وخت اس کہ مذاکرات 23 ستمبر آن بنا مننگ نا گمان ارے۔ حوالی تا رِد اٹ آئی ایم ایف مشن کم و وَد اِرا ہفتہ پاکستان اٹی مریک‘ دا وخت آ پاکستان تون جتا جتا مالیاتی و زرگزرانی باندات آتیا مذاکرات کننگک۔ حوالی پارینے کہ آئی ایم ایف ڈَل نا دورہ پاکستان نا وخت آ توسیعی فنڈ فیسلیٹی و کلائمیٹ فنانسنگ پروگرام نا جاچ اکن اسہ وخت اٹ مذاکرات مریک۔ داکان بیدس آرٹیکل فور مذاکرات ہم آئی ایم ایف مشن نا دورہ نا وخت آ کننگک۔ مذاکرات اٹی تدوک آ مالی سال انا ارٹمیکو ششماہی نا وخت آ پاکستان نا زرگزرانی کارکڑد، پک کروک آ ہدف تیا پیش رفت و ہڑتوم آ پروگرام تا رِد اٹ ہرفوک گام گیج آتا جاچ ہلنگک۔ حوالی تا رِد اٹ مذاکرات سرسہب مننگ نا حالیت اٹی ہڑتوم آ پروگرام تا رِد اٹ پاکستان کن بروک آ قسط آتا جاری مننگ نا کسر ملنگک۔ توسیعی فنڈ فیسلیٹی پروگرام نا رِد اٹ پاکستان نا چارمیکو جاچ نا مذاکرات مریک‘ وخت اس کہ کلائمیٹ فنانسنگ پروگرام نا مسٹمیکو جاچ اکن ہم ہیت و گپ کننگک۔ مذاکرات نا سرسہبی آ پاکستان ءِ توسیعی فنڈ فیسلیٹی پروگرام نا رِد اٹ پنچ میکو قسط دوئی مننگ نا اومیت ارے‘ وخت اس کہ کلائمیٹ فنانسنگ پروگرام نا رِد اٹ ہم پاکستان ءِ بروک آ قسط انا مد اٹی فنڈ جاری کننگک۔