پاکستان و تاجکستان نا تین پہ تینی واپار نا بابت پوسکن ءُ کسر پٹنگ آ امنا

اسلام آباد، پاکستان و تاجکستان تین پہ تینی واپار، کشاری کمکاری و زرگزرانی رابطہ غاتے پین شون تننگ کن پوسکن ءُ کسر پٹنگ آ امنا کرینو، بنجائی وزیر قومی غذائی رکھ و پٹ وپول رانا تنویر حسین پارینے کہ نیامی ایشیا ٹی تاجکستان پاکستان نا اہم و پتدار شریدار ءِ‘ ہڑتوم آ ملک آتا نیام اٹی واپاری کچ انا ودفنگ کن بدل گیگ واپاری کسر و پوسکن ءُ کسر پٹوئی تمک۔ بنجائی وزیر رانا تنویر حسین تون تاجکستان نا سفیر یوسف شریف زادہ اوڑدہی کرے، ہراٹی تین پہ تینی واپار، کشاری کمکاری، زرگزرانی رابطہ و تین پہ تینی تعلقداری تے پین سوگو کننگ نا باندات آ جم گپ وتران کننگا۔ اوڑدہی نا وخت آ تاجکستان نا سفیر بنجائی وزیر ءِ ستمبر اٹی اڈ ہلوک اقتصادی کمکاری تنظیم (ای سی او) نا دیوان اٹی بشخ ہلنگ نا سلہ ہم خلک۔ رانا تنویر حسین پارے کہ پاکستان و تاجکستان نا نیام اٹی ایلمی و تاریخی تعلقداریک ءُ، ہڑتوم آ ملک آک مذہبی، ربیدگی و تہذیبی رشتہ غاتیٹی گنڈوک ءُ۔ او پارے کہ پاکستان تاجکستان تون واپار و زرگزرانی کمکاری ءِ پین شون تننگ نا خواہندار ءِ۔ بنجائی وزیر پارے کہ ہڑتوم آ ملک آتا نیام اٹی واپاری کچ اٹی ودکی وخت نا اہم گرج ءِ‘ ہراڑکن واپار نا پوسکن ءُ وارخواہی و بدل گیگ واپاری کسر پٹوئی تمک۔ پاکستان نا کشاری پیداوار، فوڈ پروسیسنگ، لائیو اسٹاک، کشاری ٹیکنالوجی و ویلیو ایڈیشن نا بشخ آتیٹی تاجکستان تون کمکاری نا بھلو گمان ارے۔