ڈپٹی کمشنر خضدار نا کنڈ آن بشام شجرکاری مہم نا باقاعدہ بنا

خضدار، ڈپٹی کمشنر خضدار عبدالرزاق ساسولی ڈپٹی کمشنر کمپلیکس اٹی نہال تخسا بشام شجرکاری مہم نا باقاعدہ بنا ءِ کرے۔ دا وخت آ ڈویژنل فارسٹ آفیسر اویس اکبر زہری، اسسٹنٹ کمشنر خضدار عبدالحفیظ کاکڑ، اسسٹنٹ کمشنر وڈھ اکبر علی مزارزئی، ڈپٹی کمشنر نا ایڈمن آفیسر مراد گزوزئی و ایلو افسر آک ہم شجرکاری مہم اٹی بشخ ہلکر۔ دود اٹی ڈویژنل فارسٹ آفیسر اویس اکبر زہری و ایلو افسر آک ڈپٹی کمشنر تون اوار نہال تخار۔ ڈپٹی کمشنر خضدار عبدالرزاق ساسولی پارے کہ ضلع خضدار اٹی اولیکو وار جیو ٹیگنگ نا کمک اٹ شجرکاری نا بنا کننگانے، ہرا نا رِد اٹ نہال آتا فوٹو و کوآرڈینیٹس گوگل ارتھ آ فراوان کننگک تانکہ اوفتا چاروکی و سار سنبھال ءِ شفاف و پوسکنوڑ وڑاٹ مانیٹر کننگ مرے۔ دا مسخت کن اسہ موبائل ایپلی کیشن اس ہم زُوت درستی راستی کننگک، ہراٹی نہال تخنگ نا تاریخ، ہند و مانیٹرنگ تون گنڈوک حوال آتے اپ ڈیٹ کننگک۔ السی تپہ غاک جیو ٹیگنگ و گوگل ارتھ انا کمک اٹ شجرکاری نا مانیٹرنگ ءِ اسہ انقلابی ءُ گام اس گوندسا پاریر کہ دا گام شجرکاری مہم نا شفافیت و مدامگی ءِ پک کننگ اٹی مزل نا نشان اس مریک۔