کسٹمز بانڈڈ ویئر ہاؤسز اٹ ہچ ءُ بے ڈولی اسے نا گنجائشت اف،وزیراعظم محمد شہباز شریف

اسلام آباد، وزیراعظم محمد شہباز شریف مچ آ ملک انا کسٹمز بانڈڈ ویئر ہاؤسز نا مسہ سال انا آجوتھرڈ پارٹی آڈٹ کرفنگ نا پارت کرسا پارینے کہ کسٹمز بانڈڈ ویئر ہاؤسز اٹ ہچ ءُ بے ڈولی اسے نا گنجائشت اف۔ پی ایم آفس نا میڈیا ونگ انا رداٹ وزیراعظم دا ہیت ءِ سے شنبے نادے آ تینا کماشی ٹی فیڈرل بورڈ آف ریونیو نا باندات نا بابت جاچ دیوان نا وخت آ پارے۔ وزیراعظم پرمان کرینے کہ بے ڈولی و کانود آن چَپ کاریم نا زموار کارندہ غاتا برخلاف کانود نا رداٹ سخت کارروائی کننگے۔ دیوان اٹ کسٹم بانڈڈ ویئر ہاؤسز و ان لینڈ ریونیو انفورسمنٹ نا بابت حوال تننگا ہراٹی پاننگا کہ کسٹمز ویئر ہاؤسز اٹ پیٹرولیم نا بابت کارگو نا چاروکی وی-باک سسٹم تون گنڈوک ءِ، بانڈڈ واپار ملک انا کل درآمد نا 16.5 درسد ءِ۔ حوال اٹ پاننگا کہ وزیراعظم نا پارت آ مچ آ ملک انا کسٹم بانڈڈ ویئر ہاؤسز نا فزیکل اسٹاک ویریفیکیشن کرفنگک، اوفتا لائسنسنگ و سیکورٹی ءِ المی جوڑ کننگ کن گام گیج کننگ انگ ءِ، کسٹمز بانڈڈ ویئر ہاؤسز نا ویلیوایشن ٹیسٹنگ کرفنگک و انفارمیشن ٹیکنالوجی سسٹم آتا جاچ ءِ ہلنگک۔ وزیراعظم ءِ پاننگا کہ کسٹمز بانڈڈ ویئر ہاؤسز اٹ بے ڈولی تے چٹفنگ کن المی گام گیج کننگ انگ ءِ۔ دیوان اٹ بنجائی وزیر کانود و انصاف اعظم نذیر تارڑ، بنجائی وزیر اقتصادی باندات احد خان چیمہ، بنجائی وزیر موسمیاتی بدلی مصدق ملک، بنجائی وزیر خزانہ و بنگ محمد اورنگزیب، بنجائی وزیر حوالکاری و شینکاری عطاء اللہ تارڑ، وزیر پیٹرولیم ڈویژن علی پرویز ملک، بنجائی وزیر انفارمیشن ٹیکنالوجی و ٹیلی کام شزا فاطمہ، سلاہکار وزیراعظم ہارون اختر، قومی اسمبلی نا باسک عثمان اویسی، گورنر اسٹیٹ بینک جمیل احمد و تعلقدار بڑزکو سرکاری افسر آک بشخ ہلکر۔