ڈبلیو ڈبلیو ای نا پنی آ ریسلر کامالا ہیرس تپاخت کرے

نیویارک (مانیٹرنگ ڈیسک) ڈبلیو ڈبلیو ای نا لیجنڈری ریسلر ’کامالا ہیرس‘ 70 سال نا وہی اٹ کزیت کرے۔ درملکی خبررساں ادارہ نا رداٹ ڈبلیو ڈبلیو ای راجی رابطہ نا ویب سائٹ ٹوئٹر آ کامالا نا کزیت ءِ پک کرے۔ پنی آ مسکوہی ریسلر نا اصل پِن’جیمس ہیرس‘ ئس ولے او تینا خاص روپ نا سوب آن ’کامالا‘ نا پن اٹ درستی راستی ئس، چہرہ غا پینٹنگ اونا درست کننگ نا نشانی ئس۔ رپورٹ نا رداٹ لیجنڈ گوازی گر منہ سال تا سے ناجوڑی نا زند اس تدیفنگ اٹی ءِ، شوگر نا سوب آن او تینا ہڑتوم آ نَت تیان زہمی مسوسُس۔مسکوہی ریسلر نا کہنگ نا اصل سوب داسکان کن مون آ بتنے۔ 9 فٹ بڑز و 380 پاؤنڈ وزنی آ ریسلر نا ناگمان کہنگ آن اونا سنگت آک ہم غمگین ءُ۔ ایلو ریسلرک کامالا نا کہنگ آ اُست ہسونی نا درشانی ءِ کرسا پارینے کہ نن اسہ گچین ءُ گڑاسے گم کرین۔ گوازی گر تینا کیریئر اٹی کیہی ٹائٹل تے تینا پن آ کرے، ہوگن و انڈرٹیکر آمبار انگا بھلا ریسلر تون ہم مقابلہ کرے۔