پارک لین ریفرنس‘ زرداری آ ڈوہ بیٹ

 اسلام آباد ( مانیٹرنگ ڈیسک) احتساب عدالت پارک لین ریفرنس اٹ مسکوہی صدر آصف علی زرداری آ ڈوہ بیٹ مس۔ پارک لین ریفرنس نا سماعت احتساب عدالت اسلام آباد اٹ مس ہراٹی آصف زرداری بلاول ہاوس کراچی آن ویڈیو لنک نا کمک اٹ عدالت اٹ پیش مس وخت اس کہ ایلو دوبہ دار آتا ہم ویڈیو لنک نا کمک اٹ حاضری ءِ خلنگا۔ سماعت نا وخت آ شریک دوبہ دار اقبال خان نوری ریفرنس آن بریت و تینا موکل تون اوڑدہی کرفنگ نا خواست کرے وخت اس کہ دوبہ دار طٰحہ رضا نا وکیل ہم تینا موکل تون اوڑدہی نا درخواست دائر کرے۔ وکیل طٰحہ رضا پارینے کہ کنا موکل نا دا ریفرنس اٹ ہچ ءُ کڑد اس اف، ڈوہ بیٹ مننگ آن مست اوڑدہی نا موکل تننگے۔ ڈپٹی پراسیکیوٹر جنرل نیب سردار مظفر عباسی پاریسُس کہ چارج فریم نا مننگ آن پد سما تمک، ہراڑا وکیل طٰحہ رضا پارینے کہ نی کن تون ہیت کپہ وخت اس کہ کورٹ ءِ ایڈریس کننگے۔ جج احتساب عدالت پارینے کہ نن اینو چارج فریم کینہ و دوبہ دار آتیان اوڑدہی نا موکل ہم ایترہ۔ کراچی آن ویڈیو لنک آ ساڑی مسکوہی صدر آصف علی زرداری پارینے کہ کنا وکیل اینو سپریم کورٹ اٹ اختہ ءِ، اینو کنے آ ڈوہ بیٹ کننگ کپسہ۔ احتساب عدالت نا جج آصف زرداری تون مکالمہ کرسا پارینے کہ نما وکیل ءِ مالو آن اینو نا تاریخ نا سما ئس، ڈوہ نے آ بیٹ مریک، فاروق ایچ نائیک تینا کمکار وکیل ءِ ہم راہی کننگ کیسہ۔ جج پارینے کہ اِرا سادہ ءُ سوج ءُ انگریزی ٹی، نی اودے بننگ آن پد ورندی ایت، ہراڑا آصف زرداری پارینے کہ تینا آرڈر اٹ دا المی نوشتہ کننگے کہ وکیل نا ساڑی مفننگ اٹ کنے آ ڈوہ بیٹ کننگ انگ ءِ۔