کورونا: پد تموک ملک آتے بھلو کچ اسے ٹی مالی کمک نا گرج ءِ، عمران خان

اسلام آباد ( آن لائن)وزیر اعظم عمران خان تون اقوام متحدہ جنرل اسمبلی نا پُوسکن گچین مروک آ صدر وولکن بوزکر اوڑدہی کرینے، وزیر اعظم وولکن بوزکر ءِ اقوام متحدہ جنرل اسمبلی نا 75 میکو سیشن نا صدر نا وڑ اٹ گچین مننگ آ مبارکبادی پیش کرے اوڑدہی ٹی وزیر اعظم اقوام متحدہ نا جنرل اسمبلی نا صدر ءِ مقبوضہ کشمیر نا خراب انگا حالیت آتا بابت معلومدار کرے ہراکہ اقوام متحدہ سلامتی کونسل نا ایجنڈا ٹی ہفت دہائی متکن ءُ ویل اوار ءُ، وزیر اعظم اودے پارینے کہ 5 اگست 2019 آن پد مقبوضہ کشمیر ٹی انسانی حق و انسانی ہمدردی نا پراگندہ ءُ حالیت اسے۔ داڑتون اوار اوار کشمیری اُلس نا حق آتا پبی خلاف ورزی برجا ءِ، او مقبوضہ وادی نا حیثیت ءِ بدل کننگ نا کوشست کننگ انگ ءِ، او دا ہیت آ زور شاغا کہ اقوام متحدہ ءِ پراگندہ آ حالیت آتا ایسری ٹی تینا کڑد ءِ ادا کروئی تمک او دادے پک کننگے کہ کشمیری اُلس ءِ اوفتا حق خود ارادیت تننگے ہرانا اقوام متحدہ نا سلامتی کونسل نا متعلقہ قرار داد آتیٹی اوڑتون وعدہ کرینے، وزیر اعظم اودے تینا حکومت نا کنڈآن کورونا دَین آ کنٹرول کننگ و دانا راجی و اقتصادی اثر تتون مون تننگ کن کروک آ گام گیج آتا بابت معلومدار کرے ہراٹی انسانی جون تا بچفنگ، روز گار ءِ رکھوک جوڑ کننگ و زرگزران ءِ بچفنگ ءِ اولیت تننگک، او پارینے کہ اونا حکومت غریب و ضرورت مند آ بندغ آتیکن 8 ارب ڈالر نا بیل آﺅٹ پیکیج تس ہراکہ پاکستان نا تاریخ اٹ حکومت اسے نا کنڈآن بڑزانگا راجی سکیورٹی پیکیج ئس، وزیر اعظم پین قرضہ ریلیف نا بارواٹ جہانی گام گیج کرے اونا بابت تینا سلاہ تیان معلومدار کرے او دا ہیت آ زور شاغا کہ شونداری آ ملک آتے کورونا وائرس دَین نا راجی و اقتصادی اثر تیان بچفنگ کن بھلو کچ اسے ٹی مالی سپیس تننگ نا گرج ءِ،وزیر اعظم اودے معلومدار کرے کہ او ماحولیاتی بدلی،اسلام فوبیا و شونداری آ ملک آتیان غیر کانودی مالیاتی پیسہ غاتا رادہ کننگ آمبار انا ویل آتون مون تننگ ءِ اولیت تننگے، او اومیت کرینے کہ اقوام متحدہ نا 75 میکو سیشن اٹ دا معاملہ غاتے ترجیح تننگک۔