چیئرمین سینیٹ نا شہید سیکورٹی فورس آتا تینائی تتون ہڑزخواہی

اسلام آباد: چیئرمین سینیٹ محمد صادق سنجرانی قطبی وزیرستان نا علاقہ میران شاہ ٹی سیکورٹی فورس آتیا دہشت گرد آتا سم کاری نا ترند انگا لوز آتیٹی مذمت ءِ کرسا واقعہ ٹی شہید کارندہ غاتا خاہوت تون ہمدردی و ہڑزخواہی نا درشانی ءِ کرے و ٹھپی کارندہ غاتا زوت دراخ جوڑی کن دعا کرے۔ سینیٹ سیکرٹریٹ آن جاری بیان نا رداٹ چیئرمین محمد صادق سنجرانی پارے کہ دہشت گرد آک شونداری نا عمل ءِ توننگ خوارہ، ہراٹی او اسُل سرسہب مفسہ۔ اوپارے کہ دہشت گردی نا برخلاف جنگ و امن نا بقاء کن سیکورٹی فورس آتا بے مٹ قربانیک زیان مفسہ، پاکستان دہشت گردی نا برخلاف مدام توار بڑزکرسا کیک۔ محمد صادق سنجرانی پارے کہ دہشت گردانہ جلہو ملک اٹی امن و ایمنی نا حالیت آتے لتاڑنگ و داوڑنا لغوری کارروائیک ننا عزم ءِ متزلزل کننگ کپسہ۔ چیئرمین سینیٹ پارے کہ پاک فوج و سیکورٹی ادارہ غاتا دہشت گردی نا برخلاف قربانی بے مٹ و گمر نا قابل ءِ، پاک فوج دہشت گرد ی نا ناسور ءِ چٹفنگ کن سنبرینگوک ءِ۔ اوپارے کہ نرزور ورناتا قربانی دہشت گردی نا برخلاف جنگ انا عزم ءِ پین سوگو کیک، دہشت گرد آک تینا ناپاک مسخت آتیٹی اسُل سرسہب مفسہ۔ ڈپٹی چیئرمین سینیٹ سینیٹر مرزا محمد آفریدی ہم میران شاہ ٹی سیکورٹی فورس آتیا دہشت گرد آتا کنڈآن سم کاری نا ترند انگا لوز آتیٹی مذمت و شہید کارندہ غاتا خاہوت تون ہمدردی و ہڑزخواہی نا درشانی ءِ کرے۔

(اے پی پی)