پولیو نا ایسری کن اواری ٹی گام گیج کروئی تمک‘ سوبان سلیم دشتی

لورالائی: ڈپٹی کمشنر لورالائی سوبان سلیم دشتی پارینے کہ پولیو نا ایسری کن اواری ٹی گام گیج کروئی مریک۔ تانکہ کل چنا تسکان رکھوک پڑیک آسانی اٹ سر مریر و ہراڑے گرج ءِ اوڑے کاریم کننگ و ساڑی گرج آتیان معلومدار کننگ، المی اصلاحات مون آ اتنگ و پروگرام اٹ جوانی اتنگ نا لائحہ عمل اس ہم پک کننگے۔ تانکہ پولیو نا ایسری نا کسر اٹ دوئی آ ہر ویل اتون جوان مون تننگ کین۔ دا خیال آتا درشانی ءِ او پولیو نا بابت ڈی پیک نا دیوان نا کماشی ءِ کرسا کرے۔ او وخت آ اسسٹنٹ کمشنر بوری ظہوراحمد بلوچ،ڈسٹرکٹ ہیلتھ آفیسر ڈاکٹر میاں ناصر شیخ، ڈی ایس پی عبدالکر یم مندوخیل، ڈاکٹرفہیم اوتمانخیل ڈیلیو ایچ او نا محمد اشرف، فوکل پرسن مختار احمد، نشینل پروگرام و یونین کونسل نا سی ایم اوک ایلو کل ادارہ غاتا افسر و نمائندہ غاک ساڑی ئسر۔ دیوان آن تران کرسا ڈپٹی کمشنر لورالائی سوبان سلیم دشتی مستی پارینے کہ ساڑی حالیت آتیٹی پولیو نا ایسری کن نیشنل ایمرجنسی ایکشن پلان آ عملدرآمد ءِ پک کننگ نا گرج ءِ۔

(خ ن)