ودوک آ آبادی نا رد اٹ کوئٹہ شار اٹی آسراتی تے کن کاریم کروئی تمک،گورنر بلوچستان جعفرخان مندوخیل

کوئٹہ، گورنر بلوچستان جعفرخان مندوخیل تون صوبائی وزیر میرعاصم کرد گیلو و صوبائی اسمبلی نا باسک زرک خان مندوخیل نا کماشی ٹی جتا جتا ڈل آک گورنر ہاؤس کوئٹہ ٹی اوڑدہی کریر، ہراٹی کوئٹہ شار و اونا ایب کیب انا علاقہ غاتیٹی الس ءِ مون تروک ویل، ودوک آ اسٹریٹ کرائم، بنداوی آسراتی تا فراوانی و شاری تا خواری تا ایسری تون اوار چندی باندات آتیا جم گپ وتران کننگا۔ گورنر بلوچستان ڈل آتتون ہیت وگپ کرسا پارے کہ کوئٹہ ترندی اٹ تالان مروک ءُ شار اسے، ہندا سوب آن شاری آبادی ٹی ودکی تون اوار انتظامی، ٹریفک، سفائی، جانجوڑی، تعلیم، دیر، نکاسی آب و اسٹریٹ کرائم نا ویل آک ہم ودنگ اٹی ءُ۔ دا ویل آتتون مون تننگ کن کل تعلقدار ادارہ غاتا نیام اٹی تین پہ تینی کمکاری المی ءِ۔ السی خذمت نا راستی آ آب دادے کہ لس شاری ءِ تینا ویل آتا ایسری کن سٹی خواریک مون تروک مف۔ حکومت، انتظامیہ، پولیس و السی نمائندہ غاتے تین پہ تینی کمکاری اٹ شاری تے گچین چاگڑد و بنداوی آسراتی تا فراوانی ءِ المی کروئی مریک۔ کوئٹہ شار و اونا ایب کیب اٹی الس ءِ مون تروک ویل و خواری تا ایسری ءِ اولیتی بنداو آ المی جوڑ کننگ کن گام گیج کننگ انگ ءِ۔ شاری تے بنداوی آسراتی تا فراوانی، کسر، جانجوڑی و سفائی، نکاسی آب، بجلی، دیر و ایلو السی ویل آتا ایسری کن تعلقدار ادارہ غاتے تینا زمواری تے پین بھرمی وڑ اٹ سر تروئی مریک۔ او پارے کہ ودوک آ اسٹریٹ کرائم تا مون ءِ توننگ کن سوگو و سخت گام گیج کننگ انگ ءِ۔ شاری تا جان و مال انا رکھ حکومت و تعلقدار ادارہ غاتا بنداوی زمواری ءِ، ہندا سوب آن پولیس و انتظامیہ ءِ پوسکن آ خواست آتا رد اٹ تینا کارکڑد ءِ پین گچین کروئی تمک۔ ڈوہ تے توننگ تون اوار شاری تیٹی رکھ نا احساس ودی کننگ ہم المی ءِ۔ گورنر پارے کہ گچین مروک السی نمائندہ غاک بیرہ دفتر تسکان کچ اٹ مننگ نا جاگہ غا تینا حلقہ و جتا جتا علاقہ غاتا دورہ ءِ کرسا الس تون دراست حوال کیرو وفتا ویل آتے خف تورر۔ الس و گچین مروک نمائندہ غاتا نیام اٹی دراست حوال جمہوری نظام ءِ سوگو کننگ تون اوار ویل و خواری تا وخت آ ایسری ٹی ہم کمک کیک۔ او گچین مروک نمائندہ غاتیا زور شاغا کہ او السی ویل آتے تعلقدار محکمہ و ادارہ غاتا مون آ جوان وڑ اٹ چست کننگ تون اوار اوفتا مدامگی ایسری کن فالو اپ وزٹ ہم کیر تاکہ ویل آک بیرہ غاو و باور کرفنگ اسکان سلپس بلکہ عملی وڑ اٹ ایسر مریر۔ اوڑدہی نا وخت آ ڈل آک تینا تینا علاقہ غاتا ویل و الس ءِ مون تروک خواری تیان گورنر بلوچستان ءِ معلومدار کریر، وخت اس کہ گورنر اوفتا سوج و جتا جتا بندات آتتون تعلقدار ٹک آتا ورندی ءِ ترسا تعلقدار کمامدار آتے المی گام کننگ نا پارت و ویل آتا ایسری کن ہر وڑ انا کمک کننگ نا باور کرفے۔