چیف الیکشن کمشنر و باسک آتا تقرری،وزیراعظم شہباز اپوزیشن لیڈر محمود اچکزئی نا چٹھی نا ورندی ءِ تس

اسلام آباد، چیف الیکشن کمشنر و باسک آتا تقرری نا باندات آ وزیراعظم شہباز شریف اپوزیشن لیڈر محمود خان اچکزئی نا چٹھی نا ورندی ءِ تس۔ وزیراعظم نا کنڈ آن ورندی ٹی آئینی زمواری تے پورو کننگ کن حکومت نا کنڈ آن کمکاری نا باور کرفنگانے۔ اپوزیشن لیڈر کوئٹہ غان پدی بننگ آ چٹھی نا بابت اپوزیشن نا راہشون تے سلاہ اٹ ہلیک۔ پارلیمانی حوالی تا رِد اٹ وزیراعظم شہباز شریف اپوزیشن لیڈر محمود خان اچکزئی نا چٹھی نا ورندی راہی کرینے‘ حوالی تا رِد اٹ چیف الیکشن کمشنر و الیکشن کمیشن نا پوسکن آ باسک آتا تقرری نا بابت وزیراعظم نا چٹھی اپوزیشن لیڈر ءِ رسینگانے‘ وزیراعظم تینا چٹھی ٹی الیکشن کمیشن اٹی پوسکن آ تقرری تا بابت آئینی وڑوڈول آ عمل کننگ نا باور کرفینے حوالی نارد اٹ داکان مست مسکوہی اپوزیشن لیڈر عمر ایوب ہم چیف الیکشن کمشنر نا تقرری کن چٹھی نوشتہ کریسس۔ رانا ثناء اللہ و ڈاکٹر طارق فضل چوہدری محمود خان اچکزئی تون اوڑدہی کریسر، ہراٹی وزیراعظم نا کنڈ آن اپوزیشن لیڈر نا چٹھی نا ورندی راہی کننگ نا باور کرفنگاسس۔ حوالی تا رِد اٹ اپوزیشن لیڈر محمود خان اچکزئی دا وخت آ کوئٹہ ٹی ساڑی ءِ و او بروک آ اِرا مسہ دے اٹ اسلام آباد آ سر مریک۔ اسلام آباد سر مننگ آن پد او وزیراعظم نا چٹھی آ پی ٹی آئی راہشون تتون سلاہ کیک وخت اس کہ چیئرمین پی ٹی آئی تون اوار ایلو راہشون تیان ہم سلاہ ہلیک۔ حوالی تا رِد اٹ اپوزیشن لیڈر محمود خان اچکزئی وزیراعظم نا چٹھی آ سینیٹ اٹی اپوزیشن لیڈر علامہ راجہ ناصر عباس ءِ ہم سلاہ اٹ ہلیک۔