پاکستان بیلٹ اینڈ روڈ انیشی ایٹو نا مخ تفی ءِ کروک آتیان ءِ، جام کمال خان

اسلام آباد، بنجائی وزیر واپارجام کمال خان پارینے کہ پاکستان بیلٹ اینڈ روڈ انیشی ایٹو نا مخ تفی کروک آتیان ءِ، چین پاکستان اقتصادی راہداری پاکستان نا زرگزرانی حالیت آتے پوسکن ءُ دروشم اس تننگ ءِ، سی پیک پاکستان ءِ علاقائی رابطہ غاتا اسہ اہم ہند اس جوڑ کرینے، پاکستان نیامی ایشیا و دیکی چین ءِ باسن دیر و بندرگاہ تتون گنڈنگ ءِ۔ دا خیال آتا درشانی ءِ او پنچ شنبے نادے آ ہانگ کانگ اٹ اڈ ہلوک 11 می بیلٹ اینڈ روڈ سمٹ آن خصوصی تران کرسا کرے۔ بنجائی وزیر واپارپارے کہ بی آر آئی بیرہ اقتصادی ڈٹ اس اف بلکن ملک و قوم آتے خڑک اتنگ نا اسہ گچین پلیٹ فارم اسے۔ او پارے کہ علاقائی کمک داسہ واپاری کسر تیان مون آ ہنسا گچین ویلیو چینز اٹ بدل مننگ ءِ، ڈیجیٹل پوسکنوڑ‘ مدامگی و کسبکار روزگار ءِ واپاری پنجرنا بشخ جوڑ کننگ المی ءِ۔ جام کمال خان پارے کہ پاکستان دیکی، نیامی و دے ٹکی ایشیا نا نیام اٹ اسہ اہم واپاری پول اس جوڑ مننگ ءِ، ریلوائی، سڑک و ٹرانزٹ ٹریڈ رابطہ غاتا ودکی پاکستان ءِ نیامی ایشیا کن گونڈ و گچین ءُ کسر اس جوڑ کننگ ءِ، علاقائی رابطہ غاک پاکستان کن یک و نیم ارب صارف آتیاتالان گیشترمنڈی نا درگہ غاتے ملنگ ءُ۔ او پارے کہ بندرگاہی اصلاحات، ڈیجیٹل کسٹمز و پوسکن لاجسٹکس آن واپاری وخت و خڑچ ءِ کننگ انگ ءِ۔ پاکستان اسہ مون آ بروک ٹرانس شپمنٹ ہند انا وڑ اٹ زرکار آتے گیشترعلاقائی منڈی تسکان رسینگ فراوان کننگ کیک۔ او پارے کہ پاکستان نا زرگزرانی بحالی و گچین کریڈٹ ریٹنگ آن زرکار آتا پت اٹ ودکی مسنے، توانائی، بنداوی پنجر، معدنیات و صنعت اٹ پوسکن آ زرکاری پاکستان آ ودوک پت انا درشانیءِ۔