تعلیمی ادارہ غاتیٹی گچین تعلیمی چاگڑد فراوانی کن عملی گام گیج کننگ اُن،ایڈیشنل ڈپٹی کمشنر استامحمد

نصیرآباد، ڈپٹی کمشنر استامحمد محمد رمضان پلال نا پارت نا رِد اٹ ایڈیشنل ڈپٹی کمشنر استامحمد محمد اسماعیل لاشاری تدوک آ دے گورنمنٹ ہائی اسکول شہید رستم خان جمالی نا دورہ ءِ کرے و اسکول اٹی تفنگوک ودکی کمرہ نا باقاعدہ بناءِ کرے۔ دا وخت آ ڈسٹرکٹ ایجوکیشن آفیسر، محکمہ تعلیم نا افسر، اسکول نا ہیڈ ماسٹر، استاد و ایلو تعلقدار کمامدار آک ہم ساڑی ئسر۔ بنائی دود آن تران کرسا ایڈیشنل ڈپٹی کمشنر محمد اسماعیل لاشاری پارے کہ حکومت بلوچستان نا کنڈ آن مچ آ ضلع ٹی تعلیمی ادارہ غاتیٹی مارومسڑ طالب علم آتے گچین تعلیمی چاگڑد فراوان کننگ کن عملی گام گیج کننگ انگ انگ ءِ‘ دا رد اٹ اسکول آتا ودوک آ گرج، طالب علم آتا کچ و ساڑی کلاس روم تا کمتی ءِ مون آتخسا ضلع استامحمد اٹی 37 ودکی کمرہ نا منظوری تننگانے۔ او پارے کہ ودکی کلاس روم تا تفنگ آن اسکول آتیٹی طالب علم آتے کن پین گنجائشت ودی مریک و اوفتے گچین تعلیمی آسراتیک دوئی مریرہ۔ جوان و کشادہ کلاس روم تا فراوانی آن تدریسی کاریم اٹی گچینی بریک وخت اس کہ استاد آک ہم پین گچین وڑ اٹ تینا تدریسی زمواری تے سر ایترہ۔ ایڈیشنل ڈپٹی کمشنر پارے کہ آب اٹنگا نا فراوانی حکومت نا اولیکو اولیت اٹی اوار ءِ و دا مسخت کن تعلیمی ادارہ غاتیٹی بنداوی آسراتی تا فراوانی، انفراسٹرکچر نا گچینی و تدریسی چاگڑد ءِ گچین جوڑ کننگ آ خاص چکار کننگ انگ ءِ۔ او تعلقدار کمامدار آتیا زور شاغا کہ تفوئی کاریم تا آب ءِ پک کننگے و کل ڈٹ آک پک کروک آب و وخت انا رِد اٹ پورو کننگر۔ او مستی پارے کہ حکومت بلوچستان نا کنڈ آن تعلیمی بشخ اٹی کروک گام گیج آتا بنداوی مسخت چناتے اوفتا درگہ غا آب اٹو تعلیمی آسراتی فراوان کننگ و اوفتے گچین آخبت نا وارخواہی فراوان کننگ ءِ۔ دا رد اٹ محکمہ تعلیم و ضلعی انتظامیہ تین پہ تینی رابطہ اٹ تینا زمواری تے جوانی اٹ سر تننگ اٹی ءِ۔ داوخت آ ڈسٹرکٹ ایجوکیشن آفیسر و ایلو تعلقدار افسر آک ایڈیشنل ڈپٹی کمشنر ءِ اسکول اٹی برجا تعلیمی سرجز، طالب علم آتا کچ و ایلو گرج آتا بابت بریفنگ ہم تسر۔