امریکہ ڈیہہ اٹی امن کن نزوری تیا تالان نیام تمنگ آتے بس کے،ترجمان ایرانی وزارت خارجہ

ایران یمن نا انصاراللہ نا بابت امریکی وزیر خارجہ نا دوبہ غاتے مسترد کرے۔ ترجمان ایرانی وزارت خارجہ اسماعیل بقائی پارے کہ انصار اللہ یمن نا وتواجہ ءُ تنظیم اسے ہرا تینا فیصلہ غاتے تینٹ کیک، انصاراللہ کس اسے آن پرمان ہلپک و نہ کس اسے نا پراکسی ءِ۔ اسماعیل بقائی پارے کہ ڈیہہ اٹی بے سوگوی نا رِٹ امریکی عسکری نیام تمنگ و حاکمی پالیسیک ءُ، اگہ واشنگٹن حقی وڑ اٹ امن خواہک تو ڈیہہ اٹی بے سوگوی آ تالان نیام تمنگ آتے بند کے۔ ترجمان ایرانی وزارت خارجہ مستی پارے کہ بمب و پیشن نا زوراکی تیان یمن اٹی امن بننگ کپک کل فریق آتا امنائی روڈ میپ نا بنداو آ حقی مذاکرات اٹ امن مننگ کیک۔ ایلو کنڈ آ امریکی میڈیا نا رِد اٹ اردن اٹی امریکی اڈہ غا ایرانی میزائل جلہو نا سوب آن کیہی امریکی جنگی بالی جہاز آتے نسخان رسینگا۔ امریکی نشریاتی ادارہ نا رِد اٹ باخبر حوالی پارینے کہ چارشنبے نا سہب انا اردن نا السلطی ایئربیس آ ایرانی جلہو اٹی کم و ود 8 ایف 15 جنگی بالی جہاز آتے نسخان رسینگا، ولے اوفتے دوارہ آپریشنل کننگانے۔ رپورٹ نا رِد اٹ جلہو اٹی اسہ اے 10 تھنڈر بولٹ جنگی بالی جہاز ہم شست مس، ہرا ‘وارٹ ہاگ’ نا پن اٹ ہم چاہنگک۔ اسہ اے 10 تھنڈربولٹ بالی جہاز اس پرہ غان محروم مرسا کاریم آن سلیس۔ امریکی میڈیا نا رِد اٹ جلہو تا مقابلہ کننگ کن امریکی اڈہ غان 30 آن زیات پیٹریاٹ میزائل خسنگار، امریکہ ءِ مہالو آن پیٹریاٹ میزائل تا بھلو کاختی اسے تون مون تروئی تمنگ اٹی ءِ۔ دا جلہو ایران نا کنڈ آن امریکی جلہو تا ورندی ٹی کروک ورندی جلہو تا ریسہ نا بشخ اس ئس۔ امریکہ سے شنبے نا دے پڑو کریسس کہ ایران نا کنڈ آن امریکی بحری جنگی جہاز ءِ شست کننگ نا کوشست نا ورندی ٹی او 5 ایرانی تیل ہرفوک جہاز آتے شست کرینے۔ ایرانی پاسداران انقلاب دا دعویٰ کرینے کہ اونا ورندی ٹی 8 تیل ہرفوک جہاز، 2 جنگی بحری جہاز و اردن اٹی جوڑ امریکی اڈہ غا جلہو کننگا۔