پاکستان و سعودی عرب نا نیام اٹ تین پہ تینی دفاعی کمکاری برجاءِ،ترجمان دفترخارجہ

اسلام آباد، ترجمان دفترخارجہ پارینے کہ پاکستان و سعودی عرب نا نیام اٹی تین پہ تینی دفاعی کمکاری برجاءِ و دفاعی معاہدہ غا عملدرآمد کن وخت درکار مریک۔ اسلام آباد اٹی ہفتہ وار بریفنگ ترسا ترجمان دفتر خارجہ سجاد حیدر خان پارے کہ سعودی عرب اٹی حوثی تا جلہو تا سخت انگا لوز آتے ٹی مذمت ءِ کینہ، پاکستان سعودی سرکڑدہ و الس تون یکجہتی نا درشانی ءِ کرے، پاکستان سعودی عرب نا وتواجہی و سلامتی نا مخ تفی ءِ برجا تخک۔ او پارے کہ پاکستان و سعودی عرب نا نیام اٹی تین پہ تینی دفاعی کمکاری برجاءِ، پاکستانی فورس آک سعودی عرب اٹی ہیلکاری و لاجسٹک مسخت آتے کن ساڑی ءُ ولے دفاعی معاہدہ غا عملدرآمد کن وخت درکار مریک و زوت دفاعی کمکاری نا پین بشخ آک مون آ بریرہ۔ ترجمان پارے کہ کشمیر اقوام متحدہ نا ایجنڈا غا ساڑی ایسر مفروک ویل اسے، بھارتی دعویٰ و ہیت آتیان کشمیر نا جھیڑہ ئی حیثیت بدل مفک، اقوام متحدہ نا آفیشل نقشہ جموں و کشمیر نا جھیڑہ ئی حیثیت ءِ پاش کیک، بھارتی گام تا ہچ ءُ حیثیت اس اف۔ سجاد حیدر خان مستی پارے کہ پاکستان بھارت نا سہارن پور اٹی مسیت ءِ شہید کننگ نا مذمت ءِ کیک، دا واقعہ بابری مسجد نا یات ءِ تازہ کیک۔ ترجمان دفترخارجہ پارے کہ اوغان طالب علم آتیا رکھ خلنگ نا گمان سہی اف‘ اوغان طالب علم آتا برخلاف پورو رکھ انا ہچ ءُ فیصلہ اس متنے۔ درست ویزا و ڈگری پروگرام اٹی رجسٹریشن مروک اوغان طالب علم آک تعلیم ءِ پورو کننگ کیرہ۔