امنائی حکومت و باغی تا جنگ،یمن، سیکورٹی حالیت پین خراب، وزیر دفاع جنرل طاہر آ جلہو

صنعاء، یمن اٹی سیکورٹی حالیت پین خراب مسنے، جہانی وڑاٹ امنا کروک یمنی حکومت نا وزیر دفاع لیفٹیننٹ جنرل طاہر علی نا قافلہ غا صوبہ الضالع اٹی جلہو و گھیڑ کننگ نا حوال آک مون آ بسنو۔ بنائی رپورٹ تا رِد اٹ جلہو آن پد وزیر دفاع نا کل گارڈ آت دزگیر کننگا وخت اس کہ وزیر دفاع نا جند ءِ ہم بندی کننگانے و اونا گمانی برمتہ کننگ یا بندی کننگ نا بابت حوال آک بننگ اٹی ءُ ولے واقعہ ءِ داسکان پک کننگ تنے۔ حوثی باغی تا وزیر دفاع محمد ناصر نا بابت ہم حوال آک ءُ کہ تدوک آ دے صوبہ تعز نا دیکی علاقہ البرح اٹی یمنی فوج اونا ہند آ جلہو کرے ہراڑے کیہی حوثی کمانڈر آک خلنگار۔ یات سلے کہ وزیر دفاع نا زوال مننگ یا زندہ بچنگ نا پک حوال آک افس۔ سعودی کماشی ٹی جوڑ سیوت نا ترجمان میجر جنرل ترکی المالکی نا رِد اٹ حوثیک خمیس مشیط، ابہا و جازان نا کنڈ آ کیہی بیلسٹک میزائل و ڈرون جلہو کریر۔ ترجمان جلہو آتیٹی جانی نسخان نا حوال تتنے‘ ولے پارے کہ سیوتی فوج سعودی عرب نا وتواجہی، قومی میرات و شاری تا رکھ اکن دا جلہو تا پبی ورندی ایتک۔ دا جلہو آک ہمو وخت آ مسنو ہراتم یمن اٹی حوثی تا و سعودی مخ تفی حکومتی فورس آتا نیام اٹی جنگ اٹی ترندی بسنے۔ داکان بیدس یمن اٹی جہانی کہول آ امنا کروک یمنی حکومت نا وزیر دفاع لیفٹیننٹ جنرل طاہر علی نا قافلہ غا صوبہ الضالع اٹی جلہو نا حوال آک ءُ۔ داسہ نا چک وتاڑ نا سوب آن بحیرہ احمر و باب المندب نا اہم بحری کسر تا سیکورٹی آ گڑتی ودنگ اٹی ءِ۔ یمن اٹی تدوک آ ہفتہ غان برجا پوسکن آ جنگ اٹی 500 آن زیات بندغ نا زوال مننگ نا حوال آک مون آ بسنو، ولے ہڑتوم آ فریق آتا کچ آجو وڑ اٹ پک متنے۔