حق اکن توار چست کروک ہر بندغ تون بیداد مسنے، سردار اختر مینگل

منہ بندغ اسے گملہ غاتیٹی دسسا بلوچستان نا راہشون جوڑ کننگ نا کوشست کننگ انگ ءِ، ہموفک خواپسہ کہ بلوچستان نا ویل ایسر مرے، ہیت و گپ

کوئٹہ:  بلوچستان نیشنل پارٹی نا سروک سردار اختر مینگل پارینے کہ ہر تپہ ناراض ءِ، حق اکن توار چست کروک ہر بندغ تون بیداد مسنے، منہ بندغ اسے گملہ غاتیٹی دسسا بلوچستان نا راہشون جوڑ کننگ نا کوشست کننگ انگ ءِ، ہموفک خواپسہ کہ بلوچستان نا ویل ایسر مرے، ننے انت پن اس کہ تننگے، امنا کینہ تے، ولے داڑے سیاست کننگ کن اِلنگے۔ دا ہیت آتا درشانی ءِ او صحافی تتون ہیت و گپ کرسا کرے۔ سردار اختر مینگل پارے کہ بلوچ آتا ناراضی ہنداخس ودانے کہ داسہ اونا درشانی ءِ ہم کپسہ۔ کنے سما اف کہ حکومت ہرا بلوچ آتے ناراض پاہک، حکومت ہم داسکان پیدوار کتنے کہ پیشن تولوک، مش تیٹی ہنوک، یا شار تیٹی تولوک بلوچ آتتون ہیت مریک۔ مڑوئی منہ وزیر اس، ہرافتے وزارت رسینگانے، اوفتیان بیدس بلوچستان نا کل بندغ آک ریاست آن ناراض ءُ۔ او پارے کہ داکان ہم بھلا ویل آک مذاکرات اٹ ایسر مسنو، و دا ویل ہم مذاکرات اٹ ایسر مننگ کیک، اسہ سوج اسے نا ورندی ٹی او پارے کہ کنے لگپک کہ حکومت مذاکرات نا بابت سنجیدہ ءِ۔ مڑوئی ڈیہہ انا بدل مروک حالیت آتے ہُرسا مذاکرات نا شوشا کننگ انگ ءِ۔ انتئے کہ ناراض تو کل اریر، و ناراض ہموفک مریرہ ہرافتتون بیدادی مریک۔ پشتون و سندھیک ہم ناراض ءُ۔ صحافی و نیوز چینل والاک ہم ناراض ءُ، ولے بلوچ آتے کن دا شوشا کننگ انگ ءِ انتئے کہ ڈیہہ انا حالیت آک بدل مننگ اٹی ءُ، اونا زہم ملک آ خاص وڑ اٹ بلوچستان آ ضرور مریک، امریکی و نیٹو فورس آتا پیش تمنگ آن پد طالبان تا پیش گامی نا زہم پاکستان آ ہم سر مریک۔ او پارے کہ ننے مستین غدار و ملک دشمن آتا لڑ اٹ ہم اوار کننگا۔ ننے انت کہ پن تننگے تننگے، ولے داڑے سیاست کننگ کن اِلنگے۔ مست ہم کیہی وار ناراض بلوچ آتتون مذاکرات کننگا، اونا بھرم انت بس؟ اکبر بگٹی نا شہادت آن مست اوڑکن جہاز اس راہی کروئی ئسکہ، اودے پدی دریر، اوکان پد نواب اکبر بگٹی ءِ شہید کننگ۔ا مگہ اونا تابوت ءِ کلف خلنگ ہم مذاکرات نا بشخ اس ئس؟ گڑا ہزار آتا کچ اٹی بے گوا کننگک آک ہم مذاکرات اٹ اوار مرور؟ اختر مینگل پارے کہ منٹ اس خواپسہ کہ بلوچستان نا ویل ایسر مرے۔ اوفتیان گیشتری بندغ آک حکومت اٹی ءُ۔ منَٹ اسے گملہ غاتیٹی دسسا بلوچستان نا حقی لیڈر جوڑ کننگ نا کوشست کننگ انگ ءِ، دافک تو اسُل خواپسہ کہ بلوچستان نا ویل ایسر مرے۔