سال آ پاکستان نا زرگزران نا حالیت پین جوان مریک‘آئی ایم ایف

اسلام آباد (آن لائن) جہانی مالیاتی ادارہ (آئی ایم ایف) کورونا دَین نا سوب آن بھاز زہمی مروک آ پاکستان نا زرگزران اٹ جوانی نا مستائی ہلکنے۔ میڈیا رپورٹ آتا رداٹ جہانی مالیاتی ادارہ نا کنڈآن جاری مروک آ رپورٹ اٹ پاننگانے کہ بروک آ سال پاکستان نا زرگزران ٹریک آ بریک۔ تینا رپورٹ اٹ آئی ایم ایف کورونا وائرس آن پد ودی مروک آ حالیت اٹ ہرفوک آ حکومتی گام گیج آتا ستا ءِ کرینے۔ رپورٹ اٹ پاننگانے کہ حکومت پاکستان نا ہرفوک آ گام گیج آک زرگزران کن جوان مریرہ، پاکستان نا حکومت وقت اتون اوار لاک ڈاون اٹ نرمی آن زرگزران ءِ نسخان آن بچفینے۔ داکان مست ایشیائی شونداری بینک (اے ڈی بی) تینا رپورٹ اٹ پاریسُس کہ کورونا وائرس تالانی آن پاکستان نا زرگزرانی ءِ 16.387 ملین ڈالر آن ہلیس 4.95 بلین ڈالر یا جی ڈی پی نا 0.01 درسد آن 1.57 درسد اسکان نسخان مننگ کیک۔ اقوام متحدہ نا پاننگ ءِ کہ وائرس نا سوب آن جہانی سیل و سوات 3 درسد کم مریک ہرانا نتیجہ ٹی جہانی کہول آ 50 بلین ڈالر اسکان نا نسخان مننگ کیک۔ یات سلے کہ بجٹ آن مست پیش کروک آ اقتصادی سروے نا رداٹ بنجائی حکومت بجٹ نسخان نا کنٹرول کننگ کن 2080 ارب روپئی نا قرض ہلکنے۔ اقتصادی سروے نا رداٹ مارچ 2020 نا گڈسراٹ ہندی قرض 22 ہزار 478 ارب روپئی ریکارڈ کننگا۔ اینخو نا اولیکو 9 تو اٹ پیش نا قرض آتیٹی 3ارب ڈالر نا ودکی ریکارڈ کننگا۔ اقتصادی سروے ٹی پاننگانے کہ جولائی آن مارچ اسکان حکومتی خرچہ ٹی 30 اعشاریہ 9 درسد ودکی مس۔ کل شونداری خرچہ غاتیٹی 9 تو اٹی 24 اعشاریہ 9 درسد ودکی مس۔ کل خرچہ غاتیٹی 15 اعشاریہ 8 درسد ودکی مس۔ سروے نا رداٹ تدوک آ مالی سال نا اولیکو 10 تو اٹی 100 انڈیکس اٹ .61 درسد ودکی مس۔ تدوک آ مالی سال جولائی آن اپریل اسکان کبینی نا شرح 11.2 درسد سلیس۔