آصف زرداری کنے وزیراعلیٰ بلوچستان خواتوکہ‘نواب اسلم رئیسانی

کوئٹہ ( آن لائن) مسکوہی وزیراعلیٰ بلوچستان، چیف آف ساراوان نواب محمد اسلم خان رئیسانی پارینے کہ آصف علی زرداری بنا غان اودے وزیراعلی بلوچستان مننگ خواتوکہ۔ مسکوہی صدر تون ریکوڈک ڈٹ، ٹرانسفرک، پوسٹنگ و پرویز مشرف نا ویل آ اختلاف ئس۔ پیپلز پارٹی اسہ کنڈ آ پرویز مشرف ءِ بے نظیر بھٹو نا خونی پاریکہ تو ایلو کنڈآ جنرل مشرف نا کوئٹہ غا بننگ آ اودے بخیر کننگ کن پاریکہ۔ او پارینے کہ وزارت اعلیٰ نا دور اٹ فوجی کماش آتا کنڈآن جلا وطن بلوچ راہشون تتون مذاکرات کن پاننگا ولے ’ای ضمانت آن بیدس مذاکرات کننگ خواتوٹہ۔ نواب اسلم رئیسانی پارینے کہ حکومت کن بیرہ عمران خان آپشن اف‘ داڑان بیدس بھاز آ آپشن آک ءُ‘سردار اختر مینگل عمران حکومت نا مخ تفی ءِ چٹفنگ نا جوان ءُ فیصلہ اس کرے۔ نواب اسلم رئیسانی وزیراعلی بلوچستان جام کمال خان آ تنقید کرسا پارینے کہ ‘جام کمال ءِ ہمو گڑا غا فخر ءِ او پاہک کہ ای40 واٹس ایپ گروپ آتا ایڈمن اُٹ و او ٹوئٹر آ ہم گلابی ءُ انگریزی اس نوشتہ کیک۔’جام صاحب نا حکومت اٹ ہڑدے اسہ وزیراس غصہ کننگ اٹی ءِ، وخت اس کہ اسہ وزیر اس اودے اِلک تو دافک اودے خوش کننگ کن کارہ، او بھاز آتے دھڑکو تا کمک اٹ توننگ اٹی ءُ۔ کوئٹہ ٹی تینا اُرا ٹی عرب میڈیا ءِ خاص ءُ انٹرویو اسے ٹی نواب اسلم رئیسانی پارینے کہ اسہ سروے سے ٹی پاننگانے کہ عمران خان نا پارٹی مالو آن شیف تمننگ اٹی ءِ۔ عمران خان نا جماعت مالو ہرا پنی ئس کہ داسہ اونا پنی مننگ اٹ کمتی بننگ اٹی ءِ۔ تحریک انصاف مالو آن دھاندلی نا کمک اٹ بسوسُس۔ او پارینے کہ عمران خان بھلو بھلو دعوی کرے ولے کل دعوک بیرہ ہیت ئسر۔ داسہ تبدیلی نا ہیت آک چلینگ انگ ءُ او عمران خان تینٹ ہم پاہک کہ او شش تُو آن زیات پین سلنگ کپک۔ نواب اسلم رئیسانی پارینے کہ داسہ ہروئی دا تمک کہ مستی انت مریک۔ انتئے کہ پاکستان نا سیاسی حالیت آک بے گمانی کنڈآ ہننگ اٹی ءُ۔ دا جاگہ نا سیاست پین کس اسے نا دوٹی ءِ۔