تحریک انصاف آر ایس ایس آنبار جوڑ مسنے، حکومتی وزیر تا مذمت

اسلام آباد : وزیراعظم نا خصوصی کمکار عطا تارڑ پارینے کہ تحریک انصاف آر ایس ایس جوڑ مسنے‘ دَرو بھارت اٹ تحریک انصاف نا خلنگ پرغنگ و فوجی ادارہ غاتیا جلہو کننگ آ خوشی کننگا‘ بیداد نا زموار بندغ آتا برخلاف دہشت گردی نا مقدمہ درج کننگک‘ داسہ ادارہ سے آ جلہو مس تو پد تے خراب مریک۔ تحریک انصاف نا چیئرمین عدالت آتے ٹی پیش مننگ آن خلیسکہ‘ او ریاست مدینہ نا پن آ قوم اتون دُرو کرے‘ اینو عدالت اٹ اونا مون شیف ئس۔ محسن شاہ نواز رانجھا تون اوار پریس کانفرنس آن ترسا عطاء تارڑ پارے کہ عمران خان نا لٹ وپل نا پورو جاست پاست ءِ کننگے‘ عمران خان تینا ڈوہ ءِ منانے‘ اودے کانود نا رد اٹ دزگیر کننگانے‘ نیب کیہی وار عمران خان آ نوٹس راہی ولے او پیش متو۔ عمران نے خان منا کہ 190ملین پاؤنڈ پیشن آن بسر۔ اونا وکیل پارینے کہ القادر ٹرسٹ اٹ طالب علم آک خواننگ ءُ‘ عمران خان کرپشن اٹ نت تیان کاٹم اسکان ڈُب ہلوک ءِ۔ عمران خان لغور تیانبار عدالت آتیان نراکہ۔ سرکاری ادارہ غاتیا جلہو کروک آک بی جے پی و آر ایس ایس نا بندغ آک ءُ‘ ہراتم جی ایچ کیو و کورکمانڈر ہاؤس آ جلہو مس تو بھارت اٹ خوشی کننگا‘ داسہ کس اس سرکاری ماڑی سے نا کنڈآ بس تو اودے جوان ورندی تننگک‘ جلہو کروک آتے سزا ترفنہ‘ داسہ ریاست تینا رٹ ءِ برجا تخک‘ ہندن ءُ کارروائی کینہ اوفک ہوش آ بریرہ۔ او پارے کہ تحریک انصاف نا برانز بے سہب مسنے‘ اسہ جاگہ اس ہم ہزار بندغ پیش تمتوس منہ ٹولی ئسر۔ بیدادی نا زموار بندغ آتا برخلاف دہشت گردی نا مقدمہ مریک‘ اوفتے ویزہ‘ شناختی کارڈ و نوکری رسینگپک‘ داسہ ادارہ سے آ جلہو کریرتو زموار تے ہم تینٹ مریرہ۔ اوپارے کہ فوج و پولیس دَرو مزاحمت کتو‘ داسہ دُن مفک‘ داسہ ریاست چپ تولپک‘ ہندن ایکشن ہلنگک کہ اوفتے سما تمک۔ دا وخت آ شاہنواز رانجھا پارے کہ عمران خان توشہ خانہ نا ہرا ڈوہ بیٹ کننگ آن نراکہ ہمو اینو اوڑا بیٹ کننگانے۔ طبی جاچ اٹ نت خراب ئسر‘ دماغ خراب ئس‘ او داسہ جوان مریرہ‘ عدالت اٹ عمران خان نا کل ڈوہ تے اوفتے بنفنگانے‘ خوشی نا ہیت دادے کہ عمران خان امنا ہم کرینے۔ او پارے کہ دَرو عمران خان فوج انا گڑاتیا جلہو کرفے۔

(آن لائن)