پی ٹی آئی سروک عمران خان ءِ 8دے اکن نیب انا دوٹی تننگا

اسلام آباد : پاکستان تحریک انصاف نا چیئرمین و مسکوہی وزیراعظم عمران خان ءِ 8دے انا ریمانڈ آنیب انا دوٹی تننگا‘نیب انا کنڈآن دزگیر کروک چیئرمین پی ٹی آئی عمران خان نا برخلاف القادر یونیورسٹی ٹرسٹ کیس اٹ احتساب عدالت اٹ نیب انا کنڈآن 14 دے انا ریمانڈ نا خواست کننگاسس‘ ہراڑا فیصلہ ڈک کننگاسس‘ ڈک کروک فیصلہ ءِ بنفسا ایڈیشنل سیشن جج چیئرمین تحریک انصاف ءِ 8 دے انا ریمانڈ آ نیب انا دوٹی تس۔ احتساب عدالت نیب ءِ پرمان کرے کہ عمران خان ءِ 17 مئی آ دوارہ عدالت اٹ پیش کننگے۔ پولیس لائنز اسلام آباد اٹ جوڑ احتساب عدالت نا جج ایڈیشنل سیشن محمد بشیر کیس انا سماعت ءِ کرے‘ داوخت آ عمران خان نا وکیل خواجہ حارث، فیصل چوہدری، علی گوہر و علی بخاری عدالت اٹ پیش مسرہ۔ نیب عمران خان نا 14 دے انا ریمانڈ نا خواست کریسس‘ ہراکان گڈ عدالت سماعت اٹ وقفہ کرے‘ وقفہ غان گڈ سماعت بنا کرے تو ڈپٹی پراسیکیوٹر نیب مظفر عباسی، اسپیشل پراسیکیوٹر رافع مقصود، پراسیکیوٹر سردار ذوالقرنین و انویسٹی گیشن آفیسر میاں عمر ندیم پیش مسر۔ ڈپٹی پراسیکیوٹر نیب پارے کہ عمران خان ءِ دزگیرکننگ نا وخت آ دزگیری وارنٹ نشان تننگاسس۔ داوخت آ عمران خان پارے کہ کنے نیب آفس سر مننگ آن پد وارنٹ تننگا۔ ڈپٹی پراسیکیوٹر نیب پارے کہ کل المی کاغد آتے عمران خان نا وکیل آتے تننگک۔ عمران خان نا وکیل خواجہ حارث دلیل ترسا پارے کہ ای دزگیری نابابت کانودی بنداو آ ہیت کننگ اٹی اٹ ہرا وڑ عمران خان ءِ دزگیر کننگا کانودی وڑ اٹ دا غلط ءِ۔ ڈپٹی پراسیکیوٹر نیب پارے کہ نن داڑے کرپشن نا باندات ءِ بیان کننگ اٹی ان‘ پیسہ غاتے برطانیہ نیشنل کرائم ایجنسی ہلکوسس‘ این سی اے ہمو پیسہ غاتے حکومتِ پاکستان آ پدی راہی کرے‘ پدی بروک پیسہ غاتے بدنیتی اٹ بزنس ٹائیکون تون ایڈجسٹ کننگا۔ خواجہ حارث پارے کہ القادر ٹرسٹ چلینگ انگ ءِ‘ ڈغار آ ماڑی جوڑ مسنے‘ مخلوق القادر ٹرسٹ اٹ مفت تعلیم دوئی کننگ اٹی ءِ‘ ہرا ٹرسٹی مریک او اسہ لیگل پرسن اس مریک‘ او پبلک آفس ہولڈر مفک‘ عمران خان دا وخت آ پبلک آفس ہولڈر اف۔ ڈپٹی پراسیکیوٹر نیب دلیل تس۔ چیئرمین پی ٹی آئی عمران خان پارے کہ اوفتے ہرا ریکارڈ درکار ءِ ہرادے ای منپننگ اٹ‘ نیب پاننگ اٹی ءِ کہ ننے ریکارڈ مچ کروئی ءِ‘ ہرا پیسہ غاک بسوسر او کابینہ نا منظوری اٹ بسنو‘ ہمو وخت آ نن تون اِرا آپشن ئسر‘ یا تو نن منن تو پیسہ غاک بریرہ ارٹمیکوداکہ نن کانودی کارروائی کین تو نن ہر کیس ءِ باہ ایتنہ‘ نن کانودی کارروائی آ دا وخت اسکان 100 ملین روپئی خلکنن‘ کنے دزگیر کننگا‘ شیشہ غاتے پرغار‘ کنا ڈاکٹر ءِ بٹنگبو‘ ڈاکٹر فیصل ءِ پابو برے‘ داہندن ءُ سیلہ اس خلیرہ بندغ کرار کرار آ کہیک۔ ای خواپرہ کہ کن تون مسعود چپڑاسی والا کاریم مرے۔کنا وارنٹ جی ایچ کیو آن بسنے۔ داکان گڈ احتساب عدالت ڈک کروک فیصلہ ءِ بنفسا عمران خان ءِ 8 دے انا ریمانڈ آ نیب انا دوٹی تس۔ نیب انا کنڈآن 14دے انا ریمانڈ نا خواست کننگاسس‘ احتساب عدالت 14دے انا ریمانڈ نا نیب انا خواست ءِ مسترد کرسا عمران خان ءِ ہشت دے انا ریمانڈ آ نیب انا دوٹی تس۔

(آن لائن)