پارلیمان واکداری نا وَت و آئین نامصنف ادارہ ءِ، اسپیکر قومی اسمبلی

اسلام آباد: اسپیکر قومی اسمبلی راجہ پرویز اشرف پارینے کہ پارلیمان واک انا مرکز و آئین نا مصنف واسٹ انگا کانودساز ادارہءِ، الس نا منشا پارلیمان آن ودی مریک و غٹ ادارہ غاک الس نادا وتواجہ و بڑزکو ادارہ نا مون آ جوابدہ مریر، ہندا ننا آئین نا ہَروہ ءِ و دا اسہ تین پہ تینی شرف، متنوع و مکالمہ غا تالان پاکستان نا اسٹ انگا کسر ءِ۔ چارشنبے نادے آ قومی اسمبلی ٹی آئین پاکستان نا گولڈن جوبلی نا رداٹ اڈ ہلوک اِرادے ئی جہانی کنونشن نا بنائی سیشن آن تران کرسا اسپیکر مندوبین و مہمان تے بخیر اٹ پارے۔ دود اٹی 17 آن زیات ملک آتا مندوبین آک بشخ ہلکر۔ درملکی بشخ ہلوک آتیٹی چندی ملک آتا اسپیکرز، ڈپٹی اسپیکرز، جہانی کانودی چاہندار و چندی زند انا بشخ آتیان تعلق تخوک نمائندہ غاک شریک ءُ۔ اسپیکر پارے کہ کنے بھاز خوشی ءِ کہ نم غٹ اسلامی جمہوریہ پاکستان نا آئین نا گولڈن جوبلی نا دود اٹی شریک اورے۔ اسپیکر قومی اسمبلی نما غٹ انا داڑے ساڑی گری دا ہیت انا ڈیک ءِ کہ نم آئین و کانود نا پاسداری، جمہوریت، کانود نا حکمرانی و الس نا گچین مروک آ نمائندہ غاتا کمک اٹ واکداری تا گدریفنگ آ یخین تخرے۔ اسپیکر قومی اسمبلی وزیراعظم پاکستان نا خاص منت واری ءِ ہرفسا پارے کہ ای تینا وزیراعظم شہباز شریف نا خاص وڑاٹ منت واری ءِ ہرفیوہ کہ اونا پدریسہ مخ تفی و آئین نا 50 سال انا اسہ تُو اسکان برجاسلوک آ دود آتیٹی ذاتی است خواہی ہلک، دا وزیراعظم نا پارلیمنٹ نا بالادستی آ اونا بدل مفروک یخین نا درشانی ءِ کیک و مچ آ ایوان اونا کوشست آتا ستاءِ کننگ اٹ کنتون متفق ءِ۔ اسپیکر پارے کہ ای تینا پارٹی، پاکستان پیپلزپارٹی نا سرکڑدہ، یعنی صدر آصف علی زرداری و وزیرخارجہ نا چیئرمین بلاول بھٹو زرداری نا اسہ وڑاٹ منتوار اُٹ، ہرافک آئین نا رکھ، رکھ و دفاع کن تینا بدل مفروک عزم انا درشانی ءِ کریر۔ داسمت اٹ نما ہر گام 1973 نا آئین نا بانی شہید ذوالفقار علی بھٹو و جمہوریت نا شہید گودی بینظیر بھٹو نا دا مقدس دستاویز آتے برقرار تخنگ اٹ تروک آ قربانی تا بازگشت ءِ۔ اسپیکر قومی اسمبلی پارے کہ ای مولانا فضل الرحمان و اونا جماعت جمعیت علمائے اسلام، خالد مقبول صدیقی و متحدہ قومی موومنٹ نا باسک جناب خالد مگسی و بلوچستان نا قابل و دوراندیش سرکڑدہ غاتاہم ذاتی منت وارا ُٹ۔ اسپیکر قومی اسمبلی پارے کہ 75 سال مست سویلی ایشیا نا مسلمانک قائد اعظم نا کماشی ٹی متحد مرسا اسہ وطن اس جوڑ کننگ کن الس نا آجو است خواہی نا درشانی ءِ کریر، قائد اعظم 1928 اٹی تینا پنی آ 14 ٹک آتا کمک اٹ ننے وفاقیت و صوبائی وتواجہی نا شرف ءِ کننگ نا درس تس۔

(اے پی پی)