ملکی زرگزران نا شونداری کن گام گیج کننگ انگ ءِ، شاہ زین بگٹی

اسلام آباد: بنجائی وزیر انسداد منشیات نوابزادہ شاہ زین بگٹی پارینے کہ ریئل اسٹیٹ ملکی شونداری ٹی تمبہ نا حیثیت تخک، حکومت ملکی زرگزران نا شونداری کن پبی گام گیج آتیا عمل کننگ ءِ، اقتصادی شونداری ٹی بزنس کمیونٹی نا کڑد بھاز اہمیت تخک۔ داخیال آتا درشانی ءِ او پاکستان ایسوسی آف ایگزبیشن انڈسٹری نا چیئرمین خورشید برلاس نا کماشی ٹی اوڑدہی کروک آ ڈل اتون گپ وتران کرسا کرے۔ ڈل اٹی امین الرحمان، شمریز اقبال، فہد برلاس، محمد فیاض اعوان ئسک اوار ئسر۔ چیئرمین خورشید برلاس بنجائی وزیر ءِ پارے کہ پاکستان ایسوسی آف ایگزبیشن انڈسٹری چندی واپاری نمائش آتا کمک اٹ ملکی زرگزران نا بحالی و مون آ دننگ کن تینا کڑد ءِ ادا کننگ ءِ، دا رداٹ ایسوسی ایشن پراپرٹی بشخ انا مون آ دننگ کن ہم نمائش آتا اسہ چرجوئی اسے نا بناءِ کرینے ہرانا رداٹ ارٹ میکو انٹرنیشنل پراپرٹی ایکسپو 9 آن 11 جون اسکان کوئٹہ ٹی اڈتننگک۔ نمائش اٹی مچ آ ملک آن پنی آ بلڈرز، ڈویلپیئر، الائیڈ کنسٹرکشن انڈسٹری تون اوار بینک انا پروجیکٹ و سیل و سوات انڈسٹری تون وابستہ چندی بزنس کمیونٹی نا بھلو کچ اس بشخ ہلیک۔ ریئل اسٹیٹ تون وابستہ کمپنیک پوسکن آپروجیکٹ آتون دا نمائش نا بشخ مریرہ۔ خورشید برلاس پارے کہ زرکاری نا بابت دااسہ اہم ءُ نمائش اس مریک۔ بنجائی وزیر نوابزادہ شاہ زین بگٹی واپاری مون آ دننگ نا بابت پاکستان ایسوسی آف ایگزبیشن انڈسٹری نا گام گیج آتا ستاءِ کرے و باوری کرفے کہ او ارٹمیکو کوئٹہ نمائش اٹی بشخ ہلیک۔ بنجائی وزیر پارے کہ ریئل اسٹیٹ ملکی شونداری ٹی تمبہ نا حیثیت تخک۔ داوخت آ پاکستان ایسوسی آف ایگزبیشن انڈسٹری نا چیئرمین خورشید برلاس ڈل اتون اوار بنجائی وزیر انسداد منشیات نوابزادہ شاہ زین بگٹی ءِ خصوصی شیلڈ اس پیش کرے۔

(اے پی پی)