سعودی عرب تون خڑکی تے پین ودفنگ خوانہ، راجہ پرویز اشرف
ہڑتوم آ کنڈآتا تعلقداری تے پین سوگو کننگ کن پارلیمانی رابطہ غاتیٹی ودکی بھاز اہمیت تخک،اسپیکر قومی اسمبلی
Get real time updates directly on you device, subscribe now.
اسلام آباد: سعودی عرب نا مجلس شوریٰ نا چیئرمین ڈاکٹر عبداللہ بن محمد بن ابراہیم الشیخ چارشنبے نادے آ اسپیکر قومی اسمبلی راجہ پرویز اشرف تون اوڑدہی کرے ہراٹی ہڑتوم آ کنڈآتا تعلقداری، امت مسلمہ ءِ مون تروک چیلنج آتون اوار اہم علاقائی و جہانی امور تیا گپ وتران کننگا۔ اسپیکر گپ وتران کرساپارے کہ پاکستان و سعودی عرب نا نیام اٹ برادرانہ تعلقداری مذہب، دودوربیدگ، تاریخ و تین پہ تینی پت و شرف نا بے مٹ رشتہ غاتیٹی ءِ۔ ہڑتوم آ کنڈآتا تعلقداری تے پین سوگو کننگ کن پارلیمانی رابطہ غاتیٹی ودکی بھاز اہمیت تخک۔ اوپارے کہ سعودی عرب نا مجلس شوریٰ نا چیئرمین نا کماشی ٹی سعودی پارلیمانی ڈل انا اِرادے ئی جہانی آئینی کنونشن اٹی بشخ ہلنگ آ منت واری ءِ ہرفیوہ۔ سعودی عرب نا مجلس شوریٰ نا چیئرمین ڈاکٹر عبداللہ محمد الشیخ آئین نا 50 می سال دے انا وخت آ سرسہب جہانی آئینی کنونشن نا اڈتننگ آ مبارکبادی تس و پارے کہ آئین پاکستان نا رداٹ اسہ تُو اسکان برجاسلوک آ دود آتا سرسہب اڈتننگ ستا کڑزک۔ اوپارے کہ پاکستان و سعودی عرب مذہبی دودوربیدگی و ایلمی رشتہ غاتیٹی تفوک ءُ۔ سعودی عرب نا الس و حکومت پاکستان نا پائیدار شونداری و شونہالی نا خواہندار ءُ۔ ہڑتوم آ ایلم ملک آتیٹی پارلیمانی ڈل آتا ہن و بر آن ہڑتوم آ کنڈآتا تعلقداریک پین سوگو مریرہ۔ اسپیکر پارے کہ پاکستان سعودی عرب تون تینا برادرانہ تعلقداری تے بھاز اہمیت ایتک۔ ہڑتوم آ اسلامی ایلم ملک آک مشکل وخت اٹی مدام اسہ ایلو تون سلیسنو۔ سعودی عرب مدام مشکل وخت اٹی پاکستان نا کمک ءِ کرینے۔ سعودی عرب و پاکستان نا برادرانہ تعلقداری علاقائی شونہالی کن المی ءِ۔ سعودی عرب و ایران نا نیام اٹ تعلقداری تا بحالی بے کچ ستاکڑزک۔ اسپیکر قومی اسمبلی ہڑتوم آ ایلم ملک آتا پارلیمان تیٹی کمکاری ءِ مون آ دننگ نا گرج آ زور شاغسا پارینے کہ پاکستان نا پارلیمان ڈیجیٹلائزیشن ءِ درستی راستی کرفینے۔ ڈیجیٹلائزیشن نا گام آن نن بھلو سرسہبی اس دوئی کرینن۔ پاکستان نا پارلیمان نا ڈیجیٹلائزیشن نا سرسہب آزموندہ غاتے سعودی مجلس شوریٰ تون تبادلہ کننگ مریک۔ سعودی عرب نا مجلس شوریٰ نا چیئرمین ڈاکٹر عبداللہ بن محمد بن ابراہیم الشیخ اسپیکر قومی اسمبلی راجہ پرویز اشرف ءِ سعودی عرب نا دورہ ءِ کننگ نا سلہ خلک۔
(اے پی پی)