دہشتگردی، بیداد، بے سگی جمہوریت کن چیلنج اسے، دستور کنونشن

قومی سلامتی و دہشت گردی تور نا پن آ انسانی حق انا خلاف ورزی تے توننگے، آئینی جمہوریت کن سوگو ءُ سیاسی جماعتی نظام اس المی ءِ

0

Get real time updates directly on you device, subscribe now.

اسلام آباد: بنجائی وزیر کانود، مسکوہی چیئرمین سینیٹ و ایلوراہشونک پاکستان تون اوار مچ آ دنیا ٹی ”آئینی جمہوریت“ کن دہشت گردی، تشدد، بے سگی، چندی بنداوتیا بشخنگ، فیک نیوز، دولت نا بے بریبر بشخنگ ءِ بھلو چیلنج گوندسا پارینو کہ آئینی جمہوریت کن اسہ سوگو ءُ سیاسی جماعتی نظام اس المی ءِ، قومی سلامتی و انسداد دہشت گردی نا پن آ انسانی حق انا خلاف ورزی تے بایدے توننگے، ہندی حکومت آک، علاقائی و ہندی کہول آ قدرتی آفت و دینی مرض آتیان بچفنگ و بحالی ٹی اہم ءُ کڑد اس ادا کیرہ، تعلیم، تربیت، موسمیاتی بدلی تتون مون تننگ کن اسیجائی کوشست آتا گرج ءِ۔ چارشنبے نادے آ قومی اسمبلی ٹی آئین نا گولڈن جوبلی دود آتا رداٹ اڈ ہلوک جہانی کنونشن نا اولیکو دے بدل مروک جہانی توازن اٹ آئین، سوگوی و موافقت نا سرحال آ سیشن آن تران کرسا بنجائی وزیر کانود و انصاف سینیٹر اعظم نذیر تارڑ پارے کہ تدوک آ دور تیٹی جمہوریت آتے بھلو چیلنج اس مون آ بسنے ہرافتے ٹی ہائبرڈ جمہوریت آتا عروج، قوم پرستی، وڈی خوری، ریاست آ کوزہ، سیاست اٹی پت انا کہول اٹی کمتی، جھیڑہ و مہاجرت اٹی ودکی اوار ءِ۔ دافتیا چکار کننگتو تو دا خطرہ غاک پوسکن آ جمہوریت آتیٹی سخت جہد نا دوئی کننگ ءِ خطرہ ٹی شاغ و جمہوری اصول آتے ہم نسخان تننگ کیرہ۔ بھاز انگا مقبولیت نا زعم اٹی اختہ لیڈر الس نا پن آ اقتدار دوئی کیرہ ولے اوفتا وڑوڈول لبرل جمہوریت نا بنداوی اصول آتیکن چیلنج اس مریک۔ اوپارے کہ سیاسی بنداو تیا تقسیم ہم آئینی جمہوریت کن اسہ چیلنج اسے ولے حداسسکان مثبت تقسیم جمہوریت کن فائدہ ئی ہم ارے ولے پوسکن و جوڑ مروک جمہوریت آتیٹی جمہوری زوال نا اسہ اہم ءُ محرک اس شدید تقسیم ہم ارے۔ داوڑنا جمہوریت آک آمرانہ خصوصیت آتا حامل مریرہ۔ آئینی جمہوریت کن اسہ سوگو ءُ سیاسی جماعتی نظام اسے نا گرج مریک ہرا حکومت و حزب اختلاف نا اصول آ فریم ورک نا تہہ ٹی متعصبانہ مقابلہ نا آسراتی فراوان کیک، ہنداسوب آن داوڑنا پیش رفت حکمرانی نا تھارٹی ءِ ہم نزور کیک۔ اوپارے کہ عدلیہ نا آجوئی، میڈیا نا سالمیت، شاری آجوئی و آجوئی درشانی و ہن و بر نا آجوئی تون اوار بنداوی حق ءِ مون تروک چیلنج آک ہم جمہوریت کن خطرہ اسے ءُ۔ اوپارے کہ ہندی حکومت آک علاقائی و ہندی کہول آقدرتی آفت و دینی مرض آتیان بچنگ نا بست وبند و بحالی ٹی اہم ءُ کڑد اس ادا کیرہ۔ جان جوڑی، شاری رکھ، امن عامہ و بحالی نا ریسہ ٹی بھس مروک جونی انفراسٹرکچر نا پوسکن تفنگ اٹی ہم دا فرنٹ لائن خذمت سرایترہ۔ مسکوہی چیئرمین سینیٹ فاروق ایچ نائیک تران کرساپارے کہ آئینی جمہوریت اٹی ادارہ غاک گچین وڑاٹ کاریم کیرہ، ہندی و جہانی تنکی تیان بچنگ کن ملک اٹی جمہوری نا بنداوی پنجر المی ءِ۔ اوپارے کہ ٹیکنالوجی و گرج آتیان اواری اٹ ویل آتا ایسر اس ممکن مریک۔ ڈیجیٹل ٹیکنالوجی و سوشل میڈیا ہراڑے فائدہ مند ءِ ہموڑے اسہ چیلنج اس ہم ارے۔ اوپارے کہ دا ڈیجیٹل پلیٹ فارم جمہوریت نا مون آ دننگ و کانود نا حکمرانی کن گچین وڑٹ کاریم اٹ اتنگ مریک، اکنامک گروتھ، ٹیکس، فنانشل مارکیٹ ہم جہانی رداٹ اینو چیلنج اسے، اگہ اواری اٹ کاریم کننگے تو دا مشکل آتیان آسانی اٹ پیش تمنگ مریک۔ آذربائیجان ریپبلک نا مجلس نا ڈپٹی چیئرمین عادل آبش پارے کہ آئین اٹی غٹ انا سلاہ اوار مریک اوٹی وقتا فوقتا ترمیم ہم کننگک۔ انٹرنیٹ و سوشل میڈیا ننا زند آتا بشخ اس جوڑ مسنے داسہ اوفتے نن تینا زند آن کشنگ کپنہ سوشل میڈیا جہانی تعلقداری تیٹی گچینی اتنگ اٹ کمک ایتک ولے ہراتم دادے غلط کاریم اٹ اتنگک تو دا بھاز نسخان نا سوب جوڑ مریک۔ مسکوہی سینیٹر فرحت اللہ بابر پارے کہ ارٹ میکو چیلنج ہرانا ننے مون تروک ءِ، پاپولزم ءِ۔ اوپارے کہ مسٹ میکو چیلنج پولرائزیشن ءِ و دابھاز خطرناک ءُ۔ وزیرکانود ٹیکنالوجی و فیک نیوز انا ہیت ءِ کرینے۔ داہم بھاز بھلو چیلنج اسے، فیک نیوز جمہوریت و ادارہ غاتیکن خطرہ اسے، فیک نیوز نا کمک اٹ اسہ بیان اسے مون آ دننگک۔

(اے پی پی)

Get real time updates directly on you device, subscribe now.

Leave A Reply

Your email address will not be published.