بڑزکو کہولی تعلیم نا مونی دننگ وژن 2025 نا بشخ اسے، احسن اقبال

اسلام آباد: بنجائی وزیر ڈٹ بندی، شونداری و خصوصی گام گیج احسن اقبال پارینے کہ ملک اٹی بڑزکو تعلیم نا مون آدننگ و جامعہ غاتے پوسکن آ رجحان و آسراتی تیان شپ کننگ وژن 2025 نا بشخ ءِ، قومک تینا ردینک آتیان ہیل کپس تو دنیا نا ہچ ءُ وسیلہ اس ہم ہمو ملک انا آخبت ءِ جوڑ کننگ کپک، پاکستان 75 سال آن نزوری نا سوب آن مشکل حالیت آتیان گدرینگانے۔ داخیال آتا درشانی ءِ او چارشنبے نادے آ نیشنل یونیورسٹی آف ماڈرن لینگویجز نا ریسرچ اینڈ سٹریٹجک بلاک نا بناءِ کننگ نا وخت آکرے۔ اوچندی لیبارٹری تیٹی کاریم کروک آ طالب علم آتیان اوفتا آخبت نا لائحہ عمل، تعلیم و پٹ وپول نا بشخ اٹی پوسکنی و ٹیکنالوجی نا مون آ دننگ آ فیکلٹی و پولکارآتون گپ وتران کرے۔ بنجائی وزیر پارے کہ یونیورسٹی انتظامیہ و پولکار آک طالب علم آتا لائخی تیان پبی فائدہ ہرفر، اینو نا ورناک علم و پٹ وپول اٹی مہارت اتون جدید وڑ و ڈَول و جہانی روحانیت آن جوانی اٹ بلد ءُ۔ سٹریٹجک بلاک نا بنائی دود آن تران کرسا بنجائی وزیر ڈٹ بندی پارے کہ ملک اٹی بڑزکو تعلیم نا مون آ دننگ و جامعہ غاتے پوسکن آ اسلوب و جدید رجحان و آسراتی تیان شپ کننگ وژن 2025نا بشخ ءِ، نن 2013آن 2018 نا نیام اٹ ملک اٹی ساڑی یونیورسٹی تا لائخی و کاریم نا کچ ءِ ودفنگ تون اوار اوار پسماندہ و مر مر انگا علاقہ غاتیٹی بڑزکو تعلیم کن ادارہ غاتا جوڑ کننگ و مون آ دننگ آ چکار کرین۔ 2013آن 2018نا نیام اٹ ملک انا طول وعرض اٹ چندی جامعہ غاتے جوڑ کننگا ہرانا ملک انا تاریخ اٹ درورملپک۔ ننے تینا ورناتے بڑزکو پوسکن آ تعلیم آن آراستہ کننگ تون اوار اوار کسبکاری ءِ ہم مون آ دروئی ءِ۔ اوپارے کہ پاکستان اسہ ہندن ءُ ملک اسے ہرانا آبادی نا دوتہائی بشخ ورناتیا تالان ءِ ننے تینا ورناتے تعلیم تون اوار اوار کسب کار جوڑ کروئی ءِ تانکہ او تینا نت تیا سلنگ کیر۔

(اے پی پی)