بلوچستان اٹ آن لائن داخلہ نا بنا، کلاس آک زُوت بنا کیرہ

کوئٹہ : صوبائی وزیر تعلیم سردار یار محمد رند پارینے کہ کورونا نا دین انا سوب ان بلوچستان آخا بلکن مچ آ ملک ہرا حالیت آتیان گدرینگ انگءِ دا وڑ انا حالیت آتتون وخت اس ہم مون تروئی تمتنے، جنگ یا طوفانی آفت اسے ٹی اسکول آتے بند کننگپک، ولے چناتا جانجوڑی کن اسکول آتے بند کننگ نا گام گیج آتے کننگا، ساڑی آ نازرک حالیت آتے ٹی محکمہ تعلیم اسہ آن لائن داخلہ سے نا بناءِ کرینے تانکہ مار و مسن تا داخلہ مننگ کے۔ دا خیال آتا درشانی ءِ او تینا اسہ ویڈیو کلہو اسے ٹی کرے، سردار یار محمد رند پارے کہ کورونا وائرس نا برخلاف برجا جنگ اٹ نن خوانوک آ چنا تا جانجوڑی و رکھ اکن اسکول آتے بند کرین، اوکان پد ہم محکمہ تعلیم پدریسہ جہد کننگ ءِ کہ داحالیت آتے ٹی تعلیمی نسخان مف۔ ہندا سوب آن نن ویب سائٹ اس جوڑ کرینن ہراٹی آن لائن داخلہ غاتا بناءِ کننگانے تانکہ زیات آن زیات چناک اسکول آتے ٹی داخلہ ہلنگ کیر لمہ و باوہ غاتیان خواست ءِ کہ او تینا چناتے آن لائن داخلہ کننگ اٹ تینا کڑد ءِ ادا کیر آن لائن ٹیچر ہم تینا لائخی تے کاریم اٹ اتنگ کیک، آن لائن ٹیچنگ پروگرام نا بناءِ کننگانے تانکہ استاد آک ہم تینا کڑد ءِ ادا کننگ کیر۔ یونیسیف نا کمک اٹ محکمہ تعلیم دا گام ءِ ہرفنگ ءِ۔ داکان بیدس ”کنا اُرا کنا اسکول پروگرام“ اس ہم بناکننگ اُن۔ استاد، لمہ باوہ سول سوسائٹی نا نمائندہ غاتتون اوار خوانندہ ورناتیان خواست ءِ کہ او تینا تینا اُراتیٹی چناتے تعلیم نا فراوانی نا چرجوئی نا بناءِ کیر تانکہ اسکول آتا بند مننگ آن ہرا نسخان مننگ ءِ اونا ایسری مننگ کے۔ صوبائی وزیر تعلیم سردار یار محمدرند پارے کہ کنا اُرا کنا اسکول اسہ ہندنءُ یکتا ءُ پروگرام اس مریک ہراڑان ننے تینا چین ءِ خوانندہ کننگ اٹ کمک رسینگک، گرل گائیڈ، بوائز اسکاو ¿ٹس و ورناک دُن انگا گام گیج آتے ٹی بشخ ہلسا نن تون کمکار مریر، دا اسہ ہندنءُ یوتھ فورس اسے ہرا بے جوفہ غان نن تون کاریم کیک، اوفتا ہیلکاری نا بناءِ کرینن۔ ہرا کنا است خواہی ہم ارے کہ او تینا لائخی تے کاریم اٹ اتیر۔ اوپارے کہ مچ آ بلوچستان اٹی 9ہزار 4سد لمہ باوہ غاتتون اوار ایلو بندغ آتیا تالان کمیٹی اس جوڑ کرینن، لمہ باوہ ٹیچر اسکول کمیٹی ءِ فعال کرسا ننا راہشونی ءِ کیرہ۔ ہر اسکول اٹ ہندا کمیٹی کاریم کیک۔ یونیسیف نا ہم منتوار اُن کہ او نناکمک ءِ کننگ ءِ۔ مچ آ ملک انا ادارہ سخی تیان ہم خواست ءِ کہ او ساڑی حالیت آتے ٹی بلوچستان تون تفر اوپارے کہ کوروناوائرس بھاز بھلو چیلنج اسے ہرانا مون ءِ توننگ کن مچ آ دنیا نا ملک آک کاریم کننگ ءُ۔ اسہ ایلو آن مر مبو و تینا اُراتیٹی مبو۔ حکومتی کہول آ رکھی گام گیج کرسا تینا خاہوت و تینا مخلوق ءِ دا جوڑی آن بچفبو، سردار یار محمد رند پارے کہ کنا است خواہی ءِ کہ بلوچستان نا ہر چنا خوانندہ مرے ہراڑکن بلوچستان نا ہرورنا لمہ نا کن تون تفنگ المی ءِ۔

(اے پی پی)