پیشن ملک اٹ گٹ مروک آپاکستانی تے کن ارمانی ارین، شاہ محمود قریشی

اسلام آباد :  وزیرخارجہ مخدوم شاہ محمود قریشی پارینے کہ پیشن ملک اٹ گٹ مروک آتے کن ارمانی ارین، داسہ ہم کم و ود 40 ہزار پاکستانی وطن آ پدی بننگ نا چاری ءُ۔ صوبائی حکومت آک قومی فائدہ کن گٹ پاکستانی تا پدی اتنگ نا عمل اٹ دفترخارجہ و بنجائی حکومت تون کمک کیر۔ جمعہ نادے آ پیشن ناملک آتے ٹی رہینگوک پاکستانی تا پن اٹ تینا اہم ءُ کلہو اسے ٹی وزیرخارجہ پارے کہ ای دا سختی نا ساہت اٹی نم کل ءِ پاننگ خواوہ کہ ہراتم کووڈ۔19نا حالیت اٹ اسہ آفت اس نئے بیرہ پاکستان بلکن مچ آ دنیا ءِ پلویڑ کرینے۔ ارٹمیکو جنگ عظیم آن پد دنیا داخہ بھلو چیلنج خنتنے ہرادے اینو نن خننگ اُن۔ مچ آ دنیا ٹی 88ہزار آن زیات بندغ زوال کرینو و 14لکھ آن زیات خلقت دا وائرس آن زہمی مسنو و دا ویل داسکان ودنگ ءِ۔ دُن کہ نمے سماءِ کہ وزیراعظم عمران خان نا راہشونی ٹی مچ آ قوم غٹ تر وسیلہ غاتے کاریم اٹ اتسا دا آفت ناہمت و نرزوری اٹ مون تننگ ءُ۔ جندی وڑ اٹ، اجتماعی، صوبائی و قومی کہول آ نن دا آفت تون مون تننگ اُن۔ اوپارے کہ داجنگ اٹ ننا ڈاکٹر، نرس، و طبی بشخ اتون گنڈوک بندغ آک ہر اولیکو چر اٹ سلوک ءُ، ہرافتا کوشست و قربانی تے گوجالنگ مفک، ای اوفتے خراج تحسین پیش کیوہ نمے سما مرو ءِ کہ کوویڈ19نا تالانی ءِ توننگ کن 21مارچ آ مجبوری نا سوب آن پاکستان نا فضائی دنگءِ ہر وڑ انا بالی ہن وبر کن بند کننگا، دانا پد دا مس کہ بھاز انگا ہم وطن آک دبئی، دوحہ، استنبول، تاشقند، بینکاک و کوالالمپور کون آ بالی پٹ آتیا گٹ مسر، غٹ آن زیات گڑتی ننے ہمو ایلم تاءِ ہرا داوخت آ خلیجی ملک آتے ٹی ءُ۔ حکومت ءِ دا گٹ انگا ہم وطن آتا تکلیف آتا جوان درک ارے اوفتا ویل آتا ایسری کن، وزیراعظم عمران خان کنا کماشی ٹی اسہ کمیٹی اس جوڑ کرینے۔ کمیٹی سختی تا ایسری کن سرگڑدان ئس۔ الحمد للہ پبی کوشست آتیان پد 1600 نا کچ پاکستانیک وطن آ پدی بسنو ولے داسہ ہم کم و ود 36000 آن 40000 اسکان پاکستانی وطن آ پدی بننگ نا چاری ءُ۔ بھلا حالیت آتتون مون تننگ کن ای غٹ سفارت خانہ غاتے پارت کریٹ۔ مچ آ دنیا ٹی پاکستانی سفارتخانہ و قونصلیٹ آک ہلہلئی بنداو آ گٹ پاکستانی تا ہروڑ اٹ کمک و مدت کن کوشست کننگ ءُ۔

(اے پی پی)