وزیراعظم عمران خان نا حیات آباد میڈیکل کمپلیکس اٹی ڈاکٹر آتتون مجلس

پشاور (اے پی پی) وزیراعظم عمران خان پارینے کہ کوروناوائرس نا برخلاف ہر اولیکو چر اٹ سلسا کاریم کروک آ ڈاکٹر وطبی کارندہ غاتا رکھ ءِ حکومت اولیت ایتک، مچ آ قوم اوفتتون سلوک ءِ، ملک اٹی ہندا تُو انا گڈسر اسکان کورونا وائرس نا کیس آتے ٹی ودکی مننگ کیک۔ داخیال آتا درشانی ءِ او جمعہ نادے آ حیات آباد میڈیکل کمپلیکس اٹی ڈاکٹر آتیان تران کرسا کرے۔ وزیراعظم عمران خان پارے کہ کوروناوائرس آن ودی مروک آ حالیت آتا قوم اس جوڑمرسا مون اٹ سلوئی ءِ، کورونا نا تالان مننگ نا رجحان آن لگنگ ءِ کہ ہندا تُو انا ایسر اسکان کورونا کیس آتے ٹی ودکی مریک، کیس آتا ودنگ آن ہسپتال آتیا باریم ودک۔ اوپارے کہ ڈاکٹر و طبی کارندہ غاتے رکھی گڑاتا فراوانی آ چکار کننگ اُن، اوفتا رکھ اکن اخس کہ مننگ کیک گام گیج کننگ انگ ءِ، مچ آ قوم اوفتتون سلوک ءِ۔ وزیراعظم پارے کہ حالیت آتے مون آ تخسا گام گیج کننگ اُن، نن خوانہ کہ کورونا نا حالیت آتارداٹ لاک ڈاو ¿ن نا سوب آن دیہاڑی آ کاریم کروک آک کم آن کم زہمی مریر و کوروناہم زیات تالان مف۔