بلوچستان کابینہ نا دیوان، بولان میڈیکل کالج نا مسکوہی حیثیت بحال

کوئٹہ (خ ن)وزیراعلیٰ بلوچستان جام کمال خان نا کماشی ٹی اڈ ہلوک صوبائی کابینہ نا دیوان اٹ بولان یونیورسٹی آف میڈیکل اینڈ ہیلتھ سائنسز نا ایکٹ 2017ء اٹ بھاز اہم ءُ ترامیم نا منظوری تننگانے، ترامیم نا رداٹ بولان میڈیکل کالج نا مسکوہی حیثیت ءِ بحال کننگانے و بی ایم سی نا پرنسپل، اسٹاف و کالج نا ڈینٹل سیکشن صوبائی حکومت نا انتظامی اختیار نا رداٹ مریک وخت اس کہ بولان میڈیکل کالج بروک آ پنچ سال اسکان بولان یونیورسٹی آف میڈیکل سائنسز نا نیمہ بشخ اس مریک، کابینہ بلوچستان امپلائمنٹ آف چلڈرن (پروہیبشن اینڈ ریگولیشن) بل 2020ء نا مسودہ نا منظوری ہم تس، کابینہ جبری خواری نا ایسری نا گواچی بندغ آتا یلہ کرفنگ و بحالی نا بل 2020ء نا منظوری ہم تس ہرانا رداٹ جبری مشقت ہلوک آتے سال اسے نا سزا و اسہ لکھ روپئی اسکان ڈنڈ مریک، دا ترمیم آئی ایل او کنونشن نا رداٹ کننگانے، ترمیمی بل نا رداٹ ضلع نا کہول آ ویجیلینس کمیٹی جوڑ کننگک، کابینہ صوبہ نا ارا معدنی کمپنی بلوچستان منرل ریسورس کمپنی لمیٹڈ و بلوچستان منرلز ایکسپلوریشن کمپنی ءِ پین فائدہ مند جوڑ کننگ کن بلوچستان منرل رولز 2002ء اٹ مجوزہ ترمیم نا منظوری ہم تس، ترمیم نا رداٹ ہڑتوم آ کمپنی تے تینا نت تیا سلنگ نا وڑاٹ مائننگ لیز ہلنگ نا قانونی رکھ دوئی مریک و کمپنیک معدنی ذخائر نا پٹنگ و شونداری ٹی پرائیویٹ بشخ اتون اوار پی پی پی موڈ اٹ شریکی کننگ کیرہ، داڑتون اوار اوار اودے لیز انا دوئی کننگ نا مسابقتی کاریم اٹ اولیت تننگک، دیوان اٹ منرل رولز نا رداٹ ہندی قبائل و ہمو علاقہ غاتا اُلس نا مفاد و اونر شپ نا رکھ ءِ پک کننگ نا امنا کننگا وخت اس کہ کمپنی تے آخبت اٹ اسٹاک ایکسچینج اٹ ان لسٹ کننگ نا ہم فیصلہ کننگا، کابینہ ٹی دا ہیت آ کل امنا کریر کہ معدنی بشخ دا بشخ آتیٹی کل آن مون آٹے ہرا صوبہ نا آمدنی ٹی ودکی نا بنداو جوڑ مریک دا بابت اٹ کابینہ باسک آک معدنی کمپنی تا جوڑ کننگ اٹ جوان ءُ گام اس پن کرسا وزیراعلیٰ بلوچستان نا وژن نا ستا ءِ کننگا، سیکریٹری معدنیات دیوان ءِ معلومدار کرے کہ ہڑتوم آ کمپنی تا بورڈ آف ڈائریکٹر تا دیوان تدوک آ دے چیف سیکرٹری نا کماشی ٹی اڈ ہلک ہراٹی اہم ءُ فیصلہ نا منظوری تننگا، کابینہ ٹریفک کانود آتا خلاف ورزی آ خلوک آ ڈنڈ آتیٹی ودکی نا منظوری ہم تس ہرانا مسخت ٹریفک کانود آ عملدرآمد نا کمک اٹ ٹریفک شکست آتیا کنٹرول کننگ و قومی شاہراہ تیا مال بردار گاڈی تے مقرر کردہ وزن ہرفنگ نا پابند کروئی ءِ۔ صوبائی کابینہ بلڈنگ کنٹرول ریگولیشن 2019ء و بلڈنگ کوڈ آف پاکستان نا ترمیمی مسودہ نا ہم منظوری تس۔ ترمیم نا رداٹ بلوچستان بلڈنگ آرڈیننس 1979ء کوئٹہ غا لاگو مریک۔