پرتگالی فٹبالر کرسٹیانو رونالڈو نا تاریخی کارکڑد‘ گول آتا سنچری ءِ پورو کرے

لزبن (مانیٹرنگ ڈیسک) کرسٹیانو رونالڈو ارٹمیکو گوازی گر ءِ ہرا گول تا سنچری ءِ پورو کرسا دا اعزاز ءِ تینا پن آ کرینے۔ دا تاریخی کارنامہ ءِ او سویڈن نا برخلاف تدوک آ نن مروک آ میچ اٹی دوئی کرے۔ رونالڈو آن مست دا اعزاز ایرانی فٹبالر علی دائی تون ئس۔ علی داعی او اولیکو گوازی گر ئس ہرا 100 گول کریسُس۔ اوڑان بیدس جہانی کہول آ پین ہچ ءُُ گوازی گر اس دا کارنامہ ءِ دوئی کتنے۔ کرسٹیانو رونالڈو دا اعزاز ءِ دوئی کننگ آن پد راجی رابطہ غاتا ویب سائٹ آ تینا شیدائی تا پن آ کلہو اسے ٹی پارینے کہ ای تینا قومی ٹیم اکن تاریخی گول اس کرسا بے حد فخر محسوس کننگ اٹی اُٹ۔ او پارینے کہ کنے پاننگانے کہ ای 100 گول کروک آتیٹی اوار اُٹ بیرہ دا کافی اف، ای تینا ملک پرتگال کن 101 گول کننگ خواوہ۔ یات سلے کہ کرسٹیانو رونالڈو نا دا گول ڈائریکٹ فری کک اٹ تینا کیرئیر نا 57 میکو وخت اس کہ پرتگال کن 10 میکو گول ءِ۔ فٹبال یوئیفا نیشنز لیگ نا دا میچ اٹ پرتگال سویڈن ءِ 2-0 اٹ بے سہب کریسُس۔ میچ نا بنا دفاعی وڑ اٹ مس۔ اولیکو ہاف نا گڈ سر اٹ سپر سٹار کرسٹیانو رونالڈو نا جلہو سرسہب سلیس۔ او 45 میکو منٹ اٹ گول کرسا سنچری پورو کرے وخت اس کہ 72 میکو منٹ اٹ ارٹمیکو گول ءِ کرسا ریکارڈ نا کچ ءِ 101 کرے۔