وسیم اکرم و شعیب اختر ہم سری لنکن پریمیر لیگ اٹ اوار مسر

لاہور (مانیٹرنگ ڈیسک) پاکستان کرکٹ ٹیم نا پنی آ مسکوہی کیپٹن وسیم اکرم و فاسٹ باؤلر شعیب اختر تون اوار کیہی لیجنڈ کرکٹر لنکا پریمیر لیگ (ایس ایل پی ایل) تون اوار مسنو۔ حوال نا رداٹ لیگ نا ٹورنامنٹ نا سرسہبی نا نگرانی ءِ کروک آ ادارہ انووینیوٹیو پروڈکشن گروپ نا چیف انیل موہن منانے کہ وسیم اکرم، شعیب اختر، برائن لارا و سر ویوین رچرڈز ایس ایل پی ایل نا جتاجتا ٹیم تا مینٹور جوڑ مننگ کن راضی مسنے وخت اس کہ نن کمار سنگاکارا تون رابطہ کننگ اٹ اختہ اُن۔ او بھارت نا مسکوہی کرکٹر تا ہم ٹورنامنٹ اٹ بشخ ہلنگ نا گمان ارے کہ اوفک پارینو ننے ٹورنامنٹ نا انتظامیہ مہشون ءِ تسنے ہراٹی مسکوہی بھارتی فاسٹ باؤلر مناف پٹیل و پراوین کمار ہم دا لیگ نا بشخ مننگ آ راضی ءُُ او اومیت کیرہ کہ عرفان پٹھان و یوسف پٹھان ہم تینا خدمت آتے پیش کیر۔ ایلو کنڈآ دا ہیت قابل ذکر ءِ کہ بورڈ آف کنٹرول فار کرکٹ ان انڈیا (بی سی سی آئی) نا پالیسی نا رداٹ بھارتی گوازی گرتے ایلو ملک آتا لیگ آتیٹی بشخ ہلنگ نا موکل اف وخت اس کہ ریٹائرڈ کرکٹر آتے استثنیٰ دوئی ارے، مسکوہی گوازی گر یووراج سنگھ ہم درملکی لیگ اٹ بشخ ہلکنے ہراتم پراوین کمار ہم کیریبین پریمیر لیگ (سی پی ایل) گوازی کننگ اٹی ءِ۔