مون نا دور اٹ ڈالر ءِ رزاک آ کم تخنگ کن فارن ایکسچینج ءِ چٹی کننگا حفیظ شیخ

اسلام آباد (اے پی پی) وزیراعظم نا خزانہ سلاہکار ڈاکٹر عبدالحفیظ شیخ پارینے کہ حکومت ءِ اقتصادی تنکی میرات اٹی ملاسس، ڈالر نا قدر ءِ رزاک آ کم تخنگ کن فارن ایکسچینج ءِ چٹی کننگا ہراڑان زرمبادلہ نا کوڑی تیٹی بھلو کمتی اس بس، ڈالر نا قدر ءِ رزاک آ سرفنگ انا سوب آن مسلم لیگ ن نا دور حکومت نا پنچ سال اٹی برآمد آتیٹی صفر درسد ودکی مس، حکومت ایف بی آر تون اوار غٹ ادارہ غاتے ٹی اصلاحات اتنگ ءِ، دا عمل اٹ نجی بشخ ءِ ہم اوار کننگک، کوروناوائرس نا دین آن پاکستان نا زرگزران ءِ 3 آن ہلیس 4 کھرب روپئی نا نسخان مس۔ دین آن شون ہلوک ملک آتیانبار پاکستان اٹی ہم نیزگاری و بے روزگاری ٹی ودکی مسنے، باندات آ پوائنٹ اسکورنگ نا جاگہ غا راستکی و حساب وکتاب ءِ ہُننگ المی ءِ۔ نجی ٹی وی پروگرام اٹ گپ وتران کرسا او پارے کہ پاکستان تحریک انصاف نا حکومت ءِ اقتصادی تنکی میرات اٹی ملاسس، زرمبادلہ نا کوڑی بیرہ 9 ارب ڈالر ئسکہ، حکومت کن زرگزران ءِ چلیفنگ سخت مسوسس، ڈالر نا قدر ءِ رزاک آ کم تخنگ کن فارن ایکسچینج ءِ چٹی کننگا ہراڑان زرمبادلہ نا کوڑی تیٹی بھلو کمتی اس بس، مسلم لیگ ن نا پنچ سال اٹی برآمد آتے ٹی صفر ودکی مس انتئے کہ ڈالر نا قدر ءِ مصنوعی وڑاٹ کم کننگ آن ننا درآمد آتیٹی بھاز ودکی مسوسس۔ دا مشکل حالیت آتیٹی حکومت مالیاتی نظم و ضبط ءِ برقرار تخسا مشکل ءُ فیصلہ کرے، حکومت برآمد آتا مون آ دننگ آ چکار کرے، دامسخت کن برآمدی بشخ ءِ آسراتی تننگا۔ حسابات جاریہ نا نسخان ءِ 20 ارب ڈالر آن کم کرسا اینخو نا سال دادے مسہ ارب ڈالر نا کچ آ اتنگانے و مچ آ دنیا خناکہ پاکستان نا زرگزران تنکی آن پیش تمنگ ءِ۔ اوپارے کہ پیشن نا وام تا زرتس نا عمل نا ہم بناءِ کننگا، اینخو نا سال حکومت مستین اٹ ہلوک آ وام و سود انا مد اٹ 2900 ارب روپئی نا زرتننگ ءِ۔ اوپارے کہ حکومتی مالیاتی ڈسپلن ءِ برجاتخسا سخت وڑاٹ حکومتی خڑچ آتے کم کرے و ملکی تاریخ اٹی اولیکو وار پرائمری بیلنس مثبت مس