عبدالقیوم بیدار نا ایم فل مقالہ ”براہوئی نسائی ادب کا تحقیقی و تنقیدی مطالعہ“ نا تنقیدی جاچ                      1

عبدالقیوم بیدار نا ایم فل نا مقالہ ”براہوئی نسائی ادب کا تحقیقی و تنقیدی مطالعہ“ 2014ءٹی براہوئی اکیڈمی پاکستان نا خڑچ اٹ شینک مس۔ دا کتاب پنچ باب آ ساڑی ءِ۔ اولیکو باب براہوئی نا تاریخی پس منظر، ارٹمیکو باب براہوئی ادب، مسٹمیکو باب اٹی براہوئی لوک شاعری نا گڑاس صنف آک ساڑی ءُ۔ چارمیکو باب اٹی براہوئی نسائی ادب نا مجموعی جاچ ہلنگانے۔

اولیکو باب اٹی براہوئی نا تاریخی پس منظر، براہوئی نا وجہ تسمیہ، براہوئی نا درواڑی زبان تتون مماثلت و براہوئی لہجہ غاتے بیان کننگانے۔

ارٹمیکو باب اٹی براہوئی ادب، براہوئی ادب نا دور آک، دافتیٹی منظوم و منثور لوک ادب، محاورہ ضرب الامثال، ارٹمیکو دور اٹی تحریری ادب، ملا فقیر محمد نا براہوئی فارسی کتاب ”خذمت دین“ نا قلمی نسخہ غان بنا، ملا عبدالحکیم مشوانی، ملا محمد حسن، مکتبہ درخانی نا بنداو، مکتبہ درخانی تون گنڈوک شاعر ادیب آک، براہوئی نا جدید ادب، و شاعری، شاعر و نثر نگار آتا درستی راستی، ادب نا صنف آک، یعنی ترجمہ، افسانہ، ناول، انشائیہ، سفرنامہ، خاکہ نگاری ساڑی ءُ۔

مسٹمیکو باب اٹی براہوئی نسائی ادب ہراٹی لولی، لیکو، زہیری، لاڈے لے لڈے، مکتبہ درخانی تون گنڈوک نیاڑی قلم کار آک، مکتبہ درخانی نا بنا، براہوئی جدید نسائی ادب، براہوئی قلم کار نیاڑی تا تعارف، اوفتا شعری و نثری ادب پارہ غاک ساڑی ءُ۔

چارمیکو باب اٹی براہوئی نسائی ادب نا جم جاچ، مکتبہ ہراٹی مکتبہ براہوئیہ دین پور تون گنڈوک نیاڑیک، جدید براہوئی نسائی ادب ساڑی ءُ۔

پنچمیکو باب اٹی حاصل مطالعہ۔

داسہ برینہ اسہ وار اس ولدا باب آتا سرجم نا پارہ غا۔ اولیکو باب اٹی براہوئی زبان نا تاریخی پس منظر اٹی فاضل ایم فل اسکالر گڑاس کنفیوژن نا گواچی خننگک۔ او دُن کہ براہوئی زبان نا رد اٹ زبان تا ہرا خاہوت آن تعلقداری تخک، آریائی یا دراوڑی؟ داڑکن چندی عالم آتا حوالہ غاتے پیش کننگانے، ولے تینا سلاہ ءِ تننگتنے۔ داخس ہم پاننگتنے کہ ہرا حلقہ نا سلاہ زیات معتبر ءِ۔ یا فاضل ایم فل اسکالر ہرا حلقہ نا سلاہ تون امنا کیک۔ دُن کہ ہیزک ءِ پورّنگ نا مسخت دا مریک کہ پا  تے خاسن جوڑ کننگ، ولدا اوفتیان خسی / سی جتا کشنگ۔ ہرا وخت دا پا خاسن مفس یا دافتیان سی ءِ کشنگپک تو دن چا کہ پا  پورپک بلکن دیر پورِک۔

مقالہ نا سرحال ”براہوئی نسائی ادب نا تحقیقی و تنقیدی مطالعہ“ ءِ، تو باید دا ئس کہ مقالہ ہم ہندا وڑ اٹ مسّکہ۔ ولے داڑے نرینہ ئی ادب نا مطالعہ کننگانے، و نرینہ ادیب آتا درستی راستی پیش کننگانے۔ یا براہوئی زبان نا تاریخی پس منظر دا کل مچٹ اس غیر ضروری خننگرہ۔ دُن تو براہوئی ٹی ہرا سرحال آ کس ایم فل کے تو براہوئی زبان نا تاریخی پس منظر پیش کننگک، دا اسہ آسان ءُ کاریم اس ہم ارے۔ ولے براہوئی نسائی ادب اسہ مخصوص ءُ سرحال اسے، داڑے براہوئی زبان نا تاریخی پس منظر، براہوئی ادب نا دور آک، براہوئی نوشتکار آتا درستی راستی، براہوئی ضرب الامثال، محاورہ پین پین ہرا کہ سرحال نا رد اٹ غیر ضروری ءُ، دا کل انا جاگہ غا اگہ بھاز آخا تو داخس کننگاکہ کہ رابطہ نا زبان اردو یا ہمسائے زبانک بلوچی، پشتو، سندھی و ایلو زبان تیٹی نیاڑی نوشتکار آتا اسہ مطالعہ اس / جاچ اس پیش کننگاکہ۔ براہوئی نسائی ادب نا آب آ ہیت مسکہ، اونا شونداری، یا نسائی ادب نا پد تمنگ آ ہیت مسکہ۔ پد تمنگ نا سوب آتے پاش کننگاکہ۔ اگہ براہوئی نسائی ادب اٹی شونداری مسُّنے تو اونا شونداری و شونداری ٹی کاریم بروک آ وڑ تیا شرہ کننگاکہ۔ براہوئی نیاڑی قلم کار آتا جتا جتا دور تے پیدوار کننگاکہ، ہر دور اٹی اوفتا علمی، ادبی قلمی جاچ ءِ ہلنگاکہ کہ براہوئی نیاڑیک علمی، ادبی و ذہنی وڑ اٹ اخہ در شونداری دوئی کننگ اٹی ءُ۔ اسہ ہیت اس پین داکہ نن ہرا وخت براہوئی ”لوک ادب“ نا جاچ ءِ ہلین نظم مرے یا نثر داٹی نیاڑی تا بھلو کڑدار اسے۔ باید ہندا ئس کہ اسہ باب اس براہوئی لوک ادب اٹی نسائی کڑدار نا مسَّکہ، ولے دُن ہم اف۔

تھیسز نا دا کتاب نا مطالعہ غان ہندا ظاہر مریک کہ براہوئی نسائی ادب بھاز پدی ءِ۔ انتئے کہ بیدس منہ نیاڑی نوشتکار آن، ہرافتے ٹی طاہرہ احساس جتک، ڈاکٹر عنبرین مینگل، حمیرا صدف، آمنہ موج، نیلم مومل آن پین کس انا ذکر کڑزوک ءُ کاریم اس خننگپک۔ بیرہ اقوال زریں، چنائی معلومداری نا گڑا ءُ۔

دا مقالہ نا سرحال ءِ ”براہوئی نسائی ادب نا تحقیقی و تنقیدی مطالعہ“ مطلب کہ براہوئی نسائی ادب نا زی آ لکھنگانے ولے دا مقالہ براہوئی زبان اٹی لکھنگ نا جاگہ غا اردو ٹی لکھنگانے۔ اگہ انگریزی ٹی لکھنگاکہ ہندا خیال کننگاکہ انگریزی اسہ جہانی ءُ زبان اسے۔ انگریزی ٹی مقالہ نوشتہ کننگ نا مسخت ہندادے کہ دانا خوانوک آتے ٹی گیشتری مرے و جہانی کہول آ خواننگے۔ اگہ انگریزی ٹی نوشتہ کننگتو تو باید ئس کہ براہوئی زبان اٹی لکھنگاکہ انتئے کہ براہوئی زبان نا براہوئی نسائی ادب نا بابت تحقیق کننگانے۔

فاضل ایم فل اسکالر ”براہوئی نسائی ادب نا مجموعی جائزہ“ نا وخت آ عجیب ءُ خیال اس پیش کرینے۔ دُن کہ نوشتہ کیک:

”براہوئی نسائی ادب کی ابتداءاسی روز ہوگئی تھی جب ایک ماں نے اپنی زبان میں اپنے بچے کو لولی (لوری) سنائی۔ اس کی درازی عمر اور صحت و سلامتی کیلئے دعائیں مانگی تھی۔ یہی دعائیہ کلمات شعر کی صورت میں ڈھل کر لوری کی شکل میں لوک شاعری کا حصہ بن گئی۔ دراصل یہ شاعری ایک ماں کے جذبات کی ترجمانی ہے۔“(پنہ، 277)

دا ہیت عجیب لگک کہ اسہ لمہ اس تینا چناءِ تینا زبان اٹی لولی تس اوڑان براہوئی نسائی ادب نا بنا مس۔ اصل اٹی ایم فل یا پی ایچ ڈی نا مسخت ہم ہندادے کہ تحقیق کرسا دا معلوم کننگے کہ دا امر مس؟ اولیکو وار ہمو لمہ ہرا زبان اٹی تینا چنا ءِ لولی تس ہمو لولی نسائی ادب نا بنداو جوڑ مس؟ دا لمہ بی بی حوا تو اَلو؟ ہرا کہ تینا مار ہابیل و قابیل اس تے لولی ترسا نسائی ادب نا بنداو جوڑ مس۔ داڑے دا ہم نوشتہ مسنے کہ ”ایک ماں اپنی زبان میں اپنے بچے کو لوری سنائی“ داڑان دا مطلب مریک کہ دا تو دنیا نا ہر زبان نا ادب ءِ۔ ننے تو براہوئی زبان نا نسائی ادب نا بنا ءِ معلوم کروئی ءِ۔ کنا خیال پاہک کہ مقالہ ٹی براہوئی سرحال آن پیشن مرسا براہوئی زبان نا پس منظر، براہوئی ادب، براہوئی ادب نا دور آک، محاورہ، براہوئی نرینہ قلم کار آتا درستی راستی پیش کننگ آن جوان ئس کہ ہندا تحقیق کرسا معلوم کننگاکہ براہوئی نسائی ادب نا بنا ہرا لمہ نا دعائیہ لولی آن مس؟ ہمو لمہ دیر ئس؟ اگہ ہندا لمہ نا بارو اٹ معلومداری دوئی کننگے تو تینٹ دا معلوم مریک کہ براہوئی زبان نا بنا ہرا وخت مسّنے؟

فاضل ایم فل اسکالر نا اسہ کتاب اس ”نیاڑی تا ادب“ نا پن اٹ 2001ءاٹی براہوئی ادبی سوسائٹی نا بست و بند اٹ شینک مس۔ ہراٹی 99 نیاڑی تا ذکر ساڑی ءِ، ولے اوکان پد کہ موصوف تینا ایم فل نا مقالہ ءِ سرجم کرے، و 2015ءٹی براہوئی اکیڈمی نا خڑچ اٹ کتابی دروشم اٹی ایس تو دا ٹی دا نیاڑی تا گونشت کم مرسا 42 مسُّنے۔

ہفتئی تلار

20-27 June 2020

تاک، 24

پنہ : 05