نرسنگ پروگرام تیا چکار کیر و نرسنگ نا طالب علم آتا کچ اٹی ودکی کیر ،ڈاکٹر عارف علوی

اسلام آباد (اے پی پی) صدر مملکت ڈاکٹر عارف علوی میڈیکل یونیورسٹی تیا زور شاغانے کہ او نرسنگ پروگرام تیا چکار کیر و نرسنگ نا طالب علم آتا کچ اٹی ودکی کیر تانکہ ملک اٹی نرس آتا کمتی پورو مننگ کے۔ داخیال آتا درشانی ءِ او پنچ شنبے نادے آ ایوان صدر اٹی شہید ذوالفقار علی بھٹو میڈیکل یونیورسٹی نا سینٹ دیوان نا کماشی ٹی کرے۔ صدر مملکت میڈیکل یونیورسٹی تیا زور شاغا کہ او طالب علم آتا تعلیم نا آب ءِ گچین کیر و درملکی طالب علم آتے ہم مائل کیر۔ ایوان صدر آن جاری بیان نا رداٹ شہید ذوالفقار علی بھٹو میڈیکل یونیورسٹی نا وائس چانسلر پروفیسر تنویر خالق صدر مملکت ءِ طب انا تعلیم کن یونیورسٹی نا کڑد انا بارواٹی پریزنٹیشن تس۔ دیوان اٹی اول سینٹ دیوان نا کارروائی (منٹس) آتے پک کننگ آن بیدس یونیورسٹی نا سروس رول آتا منظوری ءِ ہم تننگا۔ سینیٹ دیوان اٹی یونیورسٹی نا سالانہ بجٹ نا منظوری آن بیدس سینٹ آن سینڈ یکیٹ کن اِراڈینز و فنانس و پلاننگ کمیٹی کن سینٹ نا اسہ باسک انا پنداری ءِ ہم پک کننگا۔ صدر مملکت پٹ و پول و آب اٹ تعلیم نا اہمیت ءِ تالان کرسا پارے کہ میڈیکل یونیورسٹی تے کوویڈ۔ 19 کون آ چیلنج آتون گچین وڑاٹ مون تننگ کن پٹ و پول و بڑزکو آب انا میڈیکل گریجویٹس تیار کننگ آ چکار کیر۔ اوپارے کہ یونیورسٹی تا سینٹ و سینڈیکیٹ کون آ گورننگ نا ادارہ غاتے تعلیمی ادارہ غاتے ٹی گڈ گورننس ءِ پک کیر دیوان اٹی وزیراعظم نا خصوصی کمکار سی ڈی اے علی نواز اعوان، وائس چانسلر شہید ذوالفقار علی بھٹو میڈیکل یونیورسٹی پروفیسر تنویر خالق، پرووائس چانسلر پروفیسر سیدہ بتول مظہر، کنٹرولر امتحانات پروفیسر طارق اقبال، سینٹ نا باسک، طب انا بشخ اتون گنڈوک سینئر چاہندار و میڈیکل کالج آتا پرنسپل آک بشخ ہلکر۔