کراچی نا ویل آتا ایسری کن بنجائی حکومت ہلہلہ گام گیج کننگ ءِ، اسد عمر

اسلام آباد (اے پی پی) بنجائی وزیر ڈٹ بندی، شونداری و اصلاحات اسد عمر پارینے کہ کراچی ننا ءِ، کراچی ٹی بجلی و ایلو ویل آتا ایسری کن بنجائی حکومت ہلہلہ ئی بنداو تیا گام گیج کننگ ءِ۔ پنچ شنبے نادے آ قومی اسمبلی ٹی کراچی ٹی بجلی نا مریس لوڈشیڈنگ و کے الیکٹرک نا باندات آتا بابت چکاری نوٹس آ شرہ ٹی بشخ ہلسا اوپارے کہ ایوان اٹی لوز آتا گچین کننگ بایدے مناسب مرے۔ کناسندھ حکومت آن خواست ءِ کہ اسلم خان نا اُراغا سم کاری نا واقعہ نا نوٹس ءِ ہلے۔ اوپارے کہ کے الیکٹرک نا نجکاری مسلم لیگ (ق) انا دور اٹی مس، پنچ سال پیپلزپارٹی نا حکومت رہینگا و پیپلزپارٹی نا وزیر بجلی راجہ پرویز اشرف ہرا داایوان اٹی ساڑی ءِ اوکے الیکٹرک اٹ مجرمانہ کارروائی تے انت اکن ہلتو، مسلم لیگ (ن) نا حکومت نا وزیرخواجہ آصف ہم ہنداڑے کن ءِ، اوایکشن انت اکن ہلتو۔ اوپارے کہ کراچی ٹی بجلی نا گرج ودسا ہنا ولے حکومت آک ہچ ءُ گام اس ہرفتوس، مچ آ پاکستان اٹی بجلی نا کارخانہ غاک ودسا ہنار ولے کراچی نا نظام داکارخانہ غاتیان بجلی دوئی کننگ کپک۔ اوپارے کہ پی پی پی نا وزیر پاریسس کہ کراچی کنا ویل اف، ہراکاریم تے پیپلزپارٹی و مسلم لیگ ن کتنو اوکاریمک داسہ مننگ ءُ ، کراچی ٹی بجلی نا ویل انا آخبتی ایسری کن کابینہ کمیٹی توانائی ہلہلہ ئی دیوان اس کرے، ہلہلہ ئی بنداو تیا معاہدہ کننگ انگ ءِ۔ ٹرانسمیشن و ڈسٹری بیوشن نظام ءِ ریکارڈ وخت اٹ گچین کننگ انگ ءِ۔ اوپارے کہ نن پانہ کہ کراچی ننا ءِ و کراچی آن بیدس پاکستان اف۔