ساڑی حکومت کروڑ نوکری و پنجا لکھ اُرا تننگ نا وعدہ ءِ پورو کننگ کتو‘ غفور حیدری

 اوتھل ( آن لائن )جمعیت علمائے اسلام (ف) نا بنجائی جنرل سیکرٹری و سینیٹر مولانا عبدالغفور حیدری پارینے کہ ساڑی حکومت علی بابا 4 دُز انا پارٹی ءِ، جمعیت علما اسلام مچ آ ملک اٹ اسہ ولدا بنا غان تحریک ءِ بنا کیک، مدرسہ غاتا بابت اٹ حکومتی بدنیتی ءِ پہہ مریک، ریاست مدینہ نا پن ءِ ہلوک آک مسیت آتے شہید کننگ اٹی ءُ۔ وخت اس اوفک مسیت آتا جاگہ غا مندر جوڑ کننگ اٹی ءُ۔ دا خیال آتا درشانی ءِ جمعیت علما اسلام نا بنجائی جنرل سیکرٹری مسکوہی ڈپٹی چیئرمین سینٹ و سنیٹر مولانا عبدالغفور حیدری تدوک آ دے کراچی ٹی جے یوآئی نا کنڈآن اڈ ہلوک آل پارٹیز کانفرنس اٹ بشخ ہلک، قلات آن کراچی آ ہنسا جامعہ مدنیہ اوتھل اٹ مچہ آرام نا وخت آ جے یوآئی اوتھل نا زموار و کارندہ غاتون ہیت وگپ کرسا کرے۔ او وخت آ جے یو آئی ضلع لسبیلہ نا نائب امیرمولاناعبدالحمیدعارف جے یو آئی اوتھل نا امیرمفتی محمد سعید جے یو آئی ضلع لسبیلہ نا ڈپٹی پریس سیکرٹری حافظ حسین احمد مدنی، فداعادل لہڑی،حمادحیدری،نوراحمدکاکڑ،قاری عبدالرحمن ثاقب،قاری عبدالوہاب فاروقی،محمد یحی میراجی،جے یو آئی وجے ٹی آئی اوتھل نا کارندہ غاتا بھلو کچ اس ساڑی ئس۔ مولانا عبدالغفور حیدری پارینے کہ گچین کاری ٹی اُلس تون بھلو بھلو وعدہ کننگ آن پد ووٹ ہلسا اسمبلی ٹی بروک آ حکومت دا وخت اسکان قوم تون کروک آ تینا اسہ وعدہ سے ہم پورو کتنے۔ او داسہ ہم اُلس ءِ بیرہ ورلغائفنگ و سٹی ءُ وعدہ کرسا کاریم تے ہلنگ اٹی ءِ۔ 2 سال آتیٹی کروڑ نوکری و پنجا لکھ اُرا تننگ نا وعدہ ءِ کروک والا ہچ ءُ کاریم اس کننگ کتو۔ وخت اس کہ اُلس ءِ بیرہ صبر کننگ نا سبخ تننگ انگ ءِ۔ ولے دا صبر او مسکوہی حکومت نا دور اٹ او انتئے کتویسُس۔