الیکشن کمیشن: منحرف باسک آتا فیصلہ ءِ زو کننگ نا خواست مسترد

اسلام آباد: الیکشن کمیشن تحریک انصاف نا قومی اسمبلی نامنحرف باسک آتا کیس انا سماعت ءِ اینوچار شنبے اسکان مو صوبائی اسمبلی نا منحرف باسک آتا کیس ءِ 13مئی اسکان پد بٹینے،کمیشن تحریک انصاف ناوکیل آتا کنڈآن صوبائی اسمبلی نا منحرف باسک آتا کیس انا فیصلہ ءِ زو کننگ نا خواست ءِ مسترد کرے وخت اس کہ قومی اسمبلی نا منحرف باسک آتابابت شاہدی تے جمع کننگ نا تون اوار شرہ ءِ ہم اینو پورو کننگک‘ سَے شنبے نا دے چیف الیکشن کمشنر ناکماشی ٹی مسہ باسکی بینچ تحریک انصاف نا قومی وصوبائی اسمبلی نا منحرف باسک آتا بابت کیس انا سماعت ءِ کرے‘ داوخت آ تحریک انصاف نا وکیل کمیشن آن خواست کرے کہ قومی اسمبلی نا منحرف باسک آتا بابت پین شاہدی کمیشن نا مون آ پیش کننگ خواوہ او پارے کہ دا منحرف باسک آک چندی ٹی وی شوز و اخبار تا کمک اٹ پارٹی آن تینا جتا مننگ نا بابت بیان تسنو ہرافتے کمیشن نا مون آ پیش کننگ المی ءِ تاکہ انصاف نا خواست آک پورو مننگ کیر۔ داوخت آ منحرف باسک آتا کنڈآن پیش مروک وکیل آک کیس اٹ پین شاہدی پیش کننگ نا خواست انا مخالفت ءِ کرسا پاریر کہ ہرا ریفرنس ءِ اسپیکر قومی اسمبلی ناکنڈآن راہی کننگا ہمو وخت آ کل شاہدی تے اوڑتون اوار کننگوسس‘ اگہ پین شاہدی اوار کننگ نا خواست ءِ منظور کننگا تو داڑان کیس پین بھلن مریک و 30دے اٹ کمیشن ءِ فیصلہ کننگ اٹ فریشانی مریک‘ تحریک انصاف نا وکیل پارے کہ اسپیکر قومی اسمبلی تون بیرہ ریفرنس جمع کننگک ہرادے او الیکشن کمیشن آ راہی کننگ نا پابند مریک کل شاہدی و ریکارڈ ءِ الیکشن کمیشن نا مون آ تخوئی مریک تاکہ کمیشن ءِ فیصلہ کننگ اٹ آسانی مرے۔ دا وخت آ چیف الیکشن کمشنر کیس انا سماعت ءِ اینو اسکان پد بٹسا ہڑتوم آوکیل آتے تینا دلیل تے پورو کننگ ناپارت کرے۔ سماعت نا وخت آ کمیشن اٹ پنجاب اسمبلی ٹی تحریک انصاف نا منحرف باسک آتا کنڈآن ورندی ہم جم کرفنگا۔ داوخت آ تحریک انصاف نا وکیل آتا کنڈآن کمیشن آن خواست کننگا کہ پنجاب اٹ برجا آئینی تنکی نا رد اٹ دانا افیصلہ ءِ اول اٹ کننگے۔ او پارے کہ پنجاب اسمبلی ٹی منحرف مروک باسک آتا کیس بھاز پیدوار ءِ و کل باسک آک پارٹی پالیسی نا برخلاف وونٹ تسنو‘دانا فیصلہ ءِ زو کننگے۔ او کمیشن آن خواست کرے کہ تحریک انصاف نامنحرف باسک آتا رکنیت ءِ فیصلہ اسکان معطل کننگے ولے الیکشن کمیشن اونا خواست ءِ مسترد کرسا کیس انا سماعت ءِ 13مئی اسکان پد بٹے۔