اقتدار الس نا امانت ءِ ، بے پرخ السی خذمت آ باورکیوہ، مٹھاخان کاکڑ

کوئٹہ (اے پی پی) صوبائی وزیر مالدار و ڈیری ڈویلپمنٹ و ماحولیات مٹھاخان کاکڑ پارینے کہ اقتدار الس نا امانت ءِ ، بے پرخ السی خذمت آ باورہ کیوہ، کنا درگہ غاک ہر بندغ کن ملوک ءُ ، الس نا بنداوی اجتماعی ویل آتا ایسری ءِ اولیت ایتوہ، داخیال آتا درشانی ءِ او ژوب اٹی تفنگوک چندی شونداری ڈٹ آتا دورہ ءِ کرسا کرے، اوپارے کہ برجا ڈٹ آتیان ژوب اٹی شونہالی بریک۔ ہراڑان لس بندغ ءِ فائدہ رسینگک، صوبائی وزیر پارے کہ غٹ ڈٹ آتے وخت آ پورو کننگے تانکہ الس ءِ زوت آن زوت داڑان فائدہ مننگ کے اوپارے کہ کوالٹی و آب آ سمجھوتہ کپنہ۔ گچین کاری تیٹی الس تون کروک آ وعدہ غاتے اسٹ اسٹ آ پورو کننگ اُن۔ صوبائی وزیر پارے کہ بدبختی اٹ تدوک آ سی سال اٹی ضلع ژوب اٹی اسہ ہم ڈیم اس جوڑ کتوس ہراڑان ژوب اٹ واٹرلیول بھاز شیف ہنا ہرا کنوئی دیر، مالداری و کشت وکشار کن بھاز نسخان ءِ۔ اوپارے کہ ننا کارکڑد الس نا مون آٹے، ای ژوب اکن اسہ بھلو بجٹ اس ایسٹ ہرا چندی ڈٹ آتیا کاریم نا بناءِ کننگانے دافتے ٹی چندی اسکول، ڈیم، روڈ، کنوئی دیر پروجیکٹ آک اوار ءُ ، اوپارے کہ 25کروڑ روپئی نا خڑچ آن کلی خواجزئی ڈیم تفنگ انگ ءِ ، اوڑتون اوار اوار کلی علی خانزئی ، گرزیزئی ، درگہ مندیزئی مندوخیل اٹی ڈیم تیا ہم کاریم برجاءِ۔ ڈیم تا پوروی آن علاقہ شونداری و شونہالی آ روان مریک۔ کشاری بشخ انا شونداری آن اوفتا گزران گچین مریک۔ ڈیم تا پوروی آن زمیندار آک فائدہ ہرفر۔ دافتیان بیدس شار انا چندی اسکول آتیا کاریم برجاءِ ہرافتیا 5کروڑ روپئی نا خڑچ آن ماڈل اسکول آ کاریم برجاءِ۔ ماڈل ہائی اسکول شار انا بھلا و مین تعلیمی ادارہ ءِ۔ اسکول اٹی 2کروڑ 10لکھ روپئی نا خڑچ آن لیب وہال تفنگ انگ ءِ ، 96لکھ روپئی نا خڑچ آن سولر سسٹم، ٹیوب ویل و ٹینکی نا جوڑکننگ، 64لکھ روپئی نا خڑچ آن چار ایڈیشنل کلاس روم تا جوڑ کننگ، 99لکھ روپئی نا خڑچ آن متکن آ ڈٹ آتیا ہم کاریم نا بناءِ کننگانے۔ داکان بیدس 6لکھ30ہزار روپئی نا خڑچ آن رائزنگ باو ¿نڈری وال تفنگک اوپارے کہ اسکول آتا گچینی کن پین گام گیج کینہ۔ علاقہ نا چندی خلق آتے ٹی پوسکن آ پرائمری اسکول تا تفنگ نا کاریم برجاءِ۔ دانہ عبداللہ زئی، علی خانزئی ، یعقوب زئی، بادینزئی، درگہ مندیزئی، قمردین، رخپوڑاٹ لکھ آ روپئی نا خڑچ آن پوسکن آ پرائمری اسکول تفنگ انگ ءِ۔ انشاءاللہ دا تفنگوک ڈٹ آتا پوروی آن الس شونداری نا پوسکن آ دور اٹ پترینگرہ۔ پنچ سال الس نا عدالت اٹ ساڑی مرسا ٹکا ٹکانا حساب ءِ ایتوہ۔