گوادر نا کنوئی دیر انا گرج آتا پورواری نا بابت سجفنگ کن دیوان

گوادر : گوادر اٹ یومیہ 40 لکھ گیلن دیر انا گرج آتے پورو کننگ کن سیکرٹری پبلک ہیلتھ اینڈ انجینئرنگ صالح بلوچ نا کماشی ٹی دیوان اس اڈ ہلک۔ ہراٹی ڈائریکٹر جنرل جی ڈی اے مجیب الرحمٰن قمبرانی، کمشنر مکران سید فیصل احمد آغا، ڈپٹی کمشنر گوادر عزت نذیر بلوچ، چیف انجینئر جی ڈی اے سید محمد ایس ای کیسکو مکران فاروق احمد جھکرانی، ایس ای پی ایچ ای یار محمد، ایکسیئن پی ایچ ای شکیل بلوچ، ایکسیئن کیسکو امیر علی بگٹی تون اوار ایلو افسرک ہم بشخ ہلکر۔ دیوان اٹ گوادر ءِ زوت اس دیر انا بیدس بندی آن فراوانی، واٹر مینجمنٹ ءِ جوان کننگ و ہڑدے نا بنداو آ شارٹ فال ءِ پورو کننگ کن جتا جتا سلاہ و سفارش آ روشنائی شاغنگا۔ وخت اس کہ دا بابت اٹ جوان گام گیج کننگ نا فیصلہ کرے۔ اُلسی غاو تا زوت اس پوروی کن واڈ و خلق آتا کہول آ رابطہ کمیٹی جوڑ کننگ نا فیصلہ کرے ہراکہ محکمہ پبلک ہیلتھ، جی ڈی اے، کیسکو و پوسکن گچین مروک آ اُلسی نمائندہ غاتا مریک۔ دیوان اٹ کیسکو ءِ پارت کننگا کہ واٹر سپلائی والا فیڈر آتیا لوڈشیڈنگ نا کچ ءِ کم تخنگے۔ سیکرٹری پی ایچ ای پارینے کہ کہ ساڑی حکومت گوادر نا شونداری و دا جاگہ نا اُلس ءِ دیر فراوان کننگ کن زوت اس گام گیج کننگ اٹی ءِ۔ شار اٹ دیر انا نظام و لائن تے جوان کننگ نا گرج ءِ۔ تانکہ اُلس ءِ دیر آنبار انگا بنداوی گرج آک زند انا کاختی تون مون تروک مف۔ ڈائریکٹر جنرل جی ڈی اے مجیب الرحمٰن قمبرانی دیوان ءِ معلومدار کرسا پارینے کہ جی ڈی اے گوادر شار ءِ پک بنداو آ دیر انا گرج آتے پورو کننگ کن جامع ڈٹ بندی نا رداٹ گام گیج کرینے و شار ءِ بیدس چٹھی آن دیر سپلائی کننگ کن شادی کور و سوڈ ڈیم اسکان 158 کلومیٹر مرغن پائپ لائن اس شاغنگک۔ ہراڑان ہڑدے نا بنداو آ 25 لکھ گیلن دیر فراوان کننگ انگ ءِ وخت اس کہ شار انا تہٹی پوسکن پائپ لائن شاغنگ نا کاریم ترندی ٹی برجا ءِ ہراکہ گڈیکو کاریم تیٹی ءِ۔

(خ ن)