جمعیت نا یو سی چیئرمین شپ ءِ کٹنگ بھلو سرسہبی اسے، دستگیر بادینی
Get real time updates directly on you device, subscribe now.
نوشکے : جمعیت علماء اسلام و اتحادی اومیت دار آتا یو سی چیرمین شپ اٹ گیشتری سرسہبی ستا کڑزک۔ نن نا تہارمئی ٹی رزلٹ ءِ بدل کروک آ سیاسی مافیاء پاننگرہ۔ یونین کونسل مل اکن زبردستی ارٹمیکو رزلٹ تننگ آر او نا تینا کرسی ءِ بچفنگ نا مجبوری مننگ کیک۔ دا خیال آتا درشانی ءِ جمعیت علماء اسلام نا راہشون مسکوہی صوبائی وزیر حاجی میر غلام دستگیر بادینی تینا بیان اسے ٹی پارینے کہ نوشکے ٹی بلدیاتی الیکشن نا اولیکو و ارٹمیکو مرحلہ نا وڑ مسٹمیکو مرحلہ ٹی گچین آ کونسلر آتا گیشتری تینا فیصلہ ءِ جمعیت علماء اسلام و اونا مخ تف آ اومیت دار آتا حق اٹ ترسا اواری نا درشانی ءِ کرے۔ ہراڑا نن دا کل کونسلر آتا منتوار اُن۔ اوفک یوسی چیرمین و وائس چیرمین گچین مننگ آ یونین کونسل مل 13 آن عبدالحمید بادینی حاجی محمد اقبال حسنی یو سی باغک تون میر عبدالرحمن لانگو شبیر احمد ساسولی، یو سی احمدوال آن سردار خلیل احمد حسنی ثناء اللہ لانگو کیشنگی آن حاجی محمد انور مینگل یونین کونسل بادینی آن میر محمد جان بادینی حاجی میر خان بادینی یونین کونسل مل آن حاجی منظور احمد گورگیج حافظ عابد گزنلی آن ملک فتح محمد و شیخ مجیب بادینی ءِ اُست انا ہُب اٹ مبارکبادی پیش کرے و اومیت آتا درشانی ءِ کرے کہ او تینا تینا علاقہ غاتیٹی جوان وڑاٹ اُلس نا خدمت ءِ کیک۔ او مستی پارینے کہ جمعیت علماء اسلام ساف گچین کاری آ پام تخک و نن گچین کاری آ اثر انداز مننگ و نتیجہ غاتا بدلی نا مذمب ءِ کینہ۔ او پارینے کہ یونین کونسل 13 مل آ رزلٹ جاری مننگ آن پد آر او آن زبردستی ارٹمیکو رزلٹ ہلنگ الیکشن ءِ شکبر کننگ نا کوشست اسے۔
(آن لائن)