جیل بھرو تحریک ءِ فرح گوگی آن بناکننگے، مریم نواز
ایبٹ آباد : مسلم لیگ ن نا چیف آرگنائزر و سینئر نائب صدر مریم نواز پارینے کہ ”جیل بھرو“ تحریک ءِ عمران خان نا اُرائی بشریٰ بی بی و اونا سنگت فرح گوگی آن بنا کننگے۔ ایبٹ آباد اٹ ن لیگ نا ورکرز کنونشن آن تران کرسا مریم نواز عمران خان آ تنقید کرسا پارے کہ ہیرا نا چلو و رشوت نا اُرائی ہلکنے‘ دزگیری ہموکان بنا کننگے‘ جیب آتے نم پُر کریرے جیل آتے ٹی الس انتئے کاہے۔ اوپارے کہ جیل آتے پُر کننگ نا دعویٰ کروک آک دہ سال تینا جیب آتے پُر کریر۔ خیبرپختونخوا نا بجٹ ہرانگ ہنا‘ مخلوق حساب خواہک۔ خیبرپختونخوا ٹی پرسجو نا ادارہ ءِ کلف کننگا‘اینو اوفتیا حساب ہلنگک تو پارہ کہ نن حساب تفنہ‘ حساب تو ہر حال اٹ تروئی مریک۔ او مستی پارے کہ عمران خان نا دامن سَفاءِ تو وہیل چیئر آ عدالت آ کاہے ولے نئے اونا نیت ساف و نئے اونا دامن سَفاءِ‘ اللہ تعالیٰ اودے دراخ جوڑ کے‘ ای اوڑکن دعا کپرہ ولے عدالت بٹنگک تو او پاہک کہ نت آ پلستر خلوک ءِ ولے جلسہ کننگ کن راولپنڈی آ کاہک۔ نے عدالت آ ہننگ آن پلستر آخا بلکہ نا ڈوہک توننگ ءُ‘عدالت بٹنگک توپلستر نشان ایتسہ‘ کس اس سازش و حکومت چٹفنگ کن خواہفے تو ددینگ اٹ کاسہ۔ اوپارے کہ خیبر پختونخوا ءِ فنڈآخا نواز شریف نا گرج ءِ۔ خیبرپختونخوا تون فنڈ ووسیلہ بھاز ءِ‘ ولے خیبرپختونخوا ٹی ہچ ءُ ڈٹ اس خننگپک۔ خیبرپختونخوا تون بیرہ اسہ ڈٹ ہزارہ موٹر وے ءِ ہرادے نوازشریف جوڑ کرے۔
(مانیٹرنگ ڈیسک)