آئی جی ہیڈ کوارٹر،بلوچستان پولیس کارندہ و خاہوت آتا آسراتی کن اِرا اہم معاہدہ غا دستخط

کوئٹہ، بلوچستان پولیس تینا کارندہ و اوفتا خاہوت آتا آسراتی و آسودہی کن اِرا اہم معاہدہ غاتیا دستخط کرینے، ہرافتیا عملدرآمد آن تعلیم و جانجوڑی نا بشخ آتیٹی پیدوار آسراتیک و مالی رعایت فراوان کننگک۔ دا رد اٹ بلوچستان پرائیویٹ اسکولز ایسوسی ایشن و کارپوریٹ ہیلتھ سروسز (CHS) تون جتا جتا مفاہمتی یاداشت (MOU) آتیا دستخط کننگا۔ بلوچستان پرائیویٹ اسکولز ایسوسی ایشن الائنس تون پک مروک آ معاہدہ نا رد اٹ حاضر سروس و زوال مروک آ ملازم آتا چناتے ٹیوشن فیس اٹی 30 درسد رعایت تننگک وخت اس کہ پولیس شہید آتا چناتے کن ٹیوشن فیس پورو وڑ اٹ معاف مریک۔ داڑان بیدس داخلہ فیس، امتحانی فیس و ایلو ادارہ ئی خڑچ آتیٹی ہم خصوصی ودکی رعایت فراوان کننگک۔ دا وخت آ ڈی آئی جی ہیڈ کوارٹر طاہر علاؤ الدین پارے کہ دا شریداری نا مسخت پولیس کارندہ غاتا چناتے آب اٹنگا تعلیم اسکان رسینگ گیگ فراوان کننگ و پولیس خاہوت آتا تعلیمی گرج آتے گچین وڑ اٹ پورو کننگ ءِ۔ او پارے کہ دا گام نئے بیرہ پولیس کارندہ غاتا خذمت آتا اعتراف نا عملی درشانی ءِ بلکہ اوفتا خاہوت آتا آسراتی و آسودہی نا کنڈ آ اسہ اہم ءُ گام اس ہم ارے۔ ایلو کنڈ آ بلوچستان پولیس و کارپوریٹ ہیلتھ سروسز (CHS) نا نیام اٹی مروک آ معاہدہ نا رد اٹ پولیس کارندہ و اوفتا خاہوت آتے آب اٹنگا طبی آسراتی تا رعایتی نہاد آتیا، ریڈیالوجی و ایلو تشخیصی ٹیسٹ آتیا 40 درسد اسکان رعایت تننگ و وخت اس کہ (CHS) نا پینل اٹی اوار ہسپتال آتیٹی ہسپتال نا بل آتیا 10 درسد اسکان رعایت دوئی مریک۔ ڈی آئی جی ہیڈ کوارٹر طاہر علاؤ الدین دا وخت آ پارے کہ پرائیویٹ اسکولز ایسوسی ایشن و کارپوریٹ ہیلتھ سروسز تون مروک آ دا معاہدہ غاک بلوچستان پولیس نا کارندہ غاتا آسراتی و آسودہی کن اسہ اہم ءُ مزل نا نشال اس مریرہ۔