تحصیل ناگ نا اولیکو اے سی خداداد ماندائی چارج ءِ سنبھالا

ناگ، سب تحصیل ناگ ءِ تحصیل نا درجہ ملنگ آن پد تحصیل ناگ انا اولیکو اسسٹنٹ کمشنر خداداد ماندائی تینا عہدہ نا چارج ءِ سنبھالا۔ دا وخت آ ناگ انا متبر آک و چندی فکری تپہ غان تعلق تخوک آ شخصیت آک اسسٹنٹ کمشنر خداداد ماندائی تون اوڑدہی کریر و اودے پوسکن آ زمواری تا سنبھالنگ آ مبارکبادی تسر۔ اوڑدہی کروک آتیٹی پرنسپل ڈاکٹر امام الدین ساسولی، جی ٹی اے بی نا مسکوہی چیئرمین عبدالسلام ساسولی، مسکوہی کونسلر میر غلام حسین ساسولی، کونسلر مولوی نعمت اللہ ساسولی، پریس کلب واشک نا سینئر نائب صدر شیر جان ساسولی و عبدالباسط ساسولی اوار ئسر۔ متبر آک دا وخت آ پاریر کہ سب تحصیل ناگ ءِ تحصیل نا درجہ ملنگ علاقہ کن ستا کڑزوک ءُ گام اسے و داڑان بیدس خداداد ماندائی آنبار انگا مخلص، لائخ و معاملہ فہم ءُ افسر اسے نا پن مننگ ہم ستا کڑزک۔