8 اکتوبر 2005ء آپاکستان اٹ بروک آ زمی جمب گیرام مفک،انجینئر امیر مقام

اسلام آباد، کشمیر، گلگت بلتستان باندات و سیفران نا بنجائی وزیر انجینئر امیر مقام 8 اکتوبر 2005ء آ پاکستان اٹ بروک آ بھسکار زمی جمب نا زہمی تے خراجِ عقیدت پیش کرے۔ پنچ شنبے نا دے آتینا اسہ بیان اسے ٹی بنجائی وزیر انجینئر امیر مقام پارے کہ 8 اکتوبر 2005ء آ پاکستان اٹ بروک آ بھسکاری کروک آ زمی جمب ننا تاریخ نا اسہ است ہسون ءُ دے اس ئس ہرا ہزار آ نہادی جان تے ننے آن درے و لکھ آ بندغ آتے بے اُرا کرے۔ ولے دا سانحہ غان پد مچ آ قوم ہرا یکجہتی، صبر و استقامت نا درشانی ءِ کرے، او ننا قومی تاریخ نا روشنا ءُ بشخ اسے۔ او یات کرسا پارے کہ زمی جمب آن پد اونا جند زہمی علاقہ غاتا دورہ ءِ کرے، ریلیف کیمپ آتیٹی خذمت سرتس و قومی و جہانی ادارہ غاتتون اوار اوار کمکی کارروائی تے منظم کرے۔ بنجائی وزیر پارے کہ کنا جند مظفرآباد، بالاکوٹ و باغ نا علاقہ غاتیٹی چندی دے تے گدریفیٹ، ٹھپی تا جان پُڑسی ءِ کریٹ، بے سیبو خاہوت آتا حال احوال ءِ ہلکٹ و کوشست کریٹ کہ ہر زہمی بندغ اسکان کمک سر مرے۔ او پارے کہ ہمو وخت آ مچ آ ملک آن منشاکار، پاک فوج، سول سوسائٹی و جہانی ادارہ غاک ہرا جوزہ اٹ کاریم کریر او اسہ درور اس جوڑ مس۔ او دا وخت آ خاص وڑاٹ شہید آتے یات کرے و اوفتا خاہوت آتتون یکجہتی نا درشانی کرے۔ اونا پاننگ ئس کہ ننے نئے بیرہ مستین ءِ یات تخوئی ءِ بلکن بروک آ وخت اکن ہم تینے قدرتی آفت آتتون مون تننگ نا لائخ جوڑ کروئی ءِ۔ بنجائی وزیر انجینئر امیر مقام پارے کہ دا دے ننے یات ترفک کہ ویل آک اسُل اخس کہ بھلن مریر، اگہ نن سیوت کرین تو اوفتا مون ءِ توننگ مریک۔