نوشکے‘بلدیاتی گچین کاری تا ضلع کونسل نا نشست آتیا حالیت بے باور
بلدیاتی گچین کاری تا چارمیکو راؤنڈ اٹ ضلع کونسل نا مخصوص نشست آتیا اِرا پینل اومیتدار سلفینو‘ بی این پی معجزہ سیکن ہُروک
نوشکے : بلدیاتی گچین کاری تا ضلع کونسل نا مخصوص نشست آتیا بے باوری برجا‘ جے یو آئی و سیوتیک سرسہبی کن کوشست آک برجا۔ بی این پی اسہ وار ولدا معجزہ کن ہُروک۔ نوشکے ٹی میونسپل کمیٹی نا چیئرمین شپ کٹنگ آن پد جے یو آئی عوامی پینل وآجو اومیتدار آک ضلع کونسل نا مخصوص نشست آتیاتینا حریف بلوچستان نیشنل پارٹی ءِ ٹف ٹائم تننگ نافیصلہ کرینو۔ نوشکے نا 16یونین کونسل اٹ 9 یونین کونسل اٹ گیشتری جے یو آئی و اوفتا سیوتی تاءِ وخت اس کہ بی ین پی ءِ 7 یونین کونسل اٹ چیئرمین تا مخ تفی دوئی ءِ۔ بلدیاتی گچین کاری تا چارمیکو راؤنڈ اٹ ضلع کونسل نا مخصوص نشست آتیا ہڑتوم آ پینل آک اومیتدار سلفینو ولے جے یو آئی و اونا سیوتی تا اختلاف پاش وڑ اٹ مون آ بسنے۔ یونین کونسل مل انا بھلا سیاسی و کاروباری شخصیت حاجی محمد مراد بادینی ہرا جے یو آئی نا راہشون مسکوہی صوبائی وزیر حاجی میر غلام دستگیر بادینی نا سپورٹر اسے دا وار دا سیوت آن خوش اف و آجو حیثیت اٹ مخصوص نشست آ اومیتدار آنبار گچین کاری تے ٹی بشخ ہلنگ اٹی ءِ و آخبت اٹ ضلع کونسل نا چیئرمین نا نشست آ گچین کاری تے ٹی بشخ ہلنگ خواہک۔ حاجی محمد مراد بادینی نا کنڈآن پندار کاغد جمع کرفنگ آن پد جمیعت علماء اسلام واونا سیوتی تے ٹی تاڑ واڑ تمانے۔ جے یو آئی ظہور احمد بادینی و حافظ عبداللہ گورگیج ءِ اومیتدار پن کرینے ولے حاجی محمد مراد گچین کاری تے ٹی بشخ ہلنگ نا فیصلہ ءِ کرسا آزمائشت اٹ شاغانے۔ حاجی محمد مراد بادینی ءِ دزکش کننگ کن کوشست کننگ انگ ءِ۔ ایلو کنڈآ بلوچستان نیشنل پارٹی ہرادے جے یوآئی و اونا سیوتیک میونسپل کمیٹی نا چیئرمین شپ نا گچین کاری تے ٹی بے سہب کرینے‘ اسہ وار ولدا معجزہ سیکن ہُروک ءِ۔ اگہ جے یو آئی و اونا سیوتی تا اختلاف ہندن سلیس تو بی این پی ضلع کونسل نا مخصوص نشست آتیا سرسہبی دوئی کننگ کیک۔
(آن لائن)