سی پیک نا بابت بلوچستان گیم چینجر اسے‘سعید سرپرہ

کوئٹہ : بلوچستان زرکاری بورڈ انا چیئرمین سعیداحمد سرپرہ پارینے کہ بلوچستان اٹ کاروبار نا بھاز وارخواہی ارے‘ سی پیک نا بابت بلوچستان گیم چینجر اسے‘ پرامن چاگڑد شونداری نا ضمانت ءِ۔ ہندا سوب آن دنیا نا مون آ ننے بلوچستان نا جوان ءُ دروشم اس مون آ اتوئی ءِ‘ کوئٹہ پراپرٹی کنونشن آن نئے بیرہ رئیل اسٹیٹ نا بشخ اتون گنڈوک بندغ آتے فائدہ مریک بلکہ گنڈوک صنعت آتے ہم فائدہ مریک‘ ایکسپو ٹی پاکستان، دوبئی و ترکی آن ہم بندغ آک بننگ اٹی ءُ‘ نیاڑی تیکن جتاءُ اسٹال خلنگانے۔ دا خیال آتا درشانی ءِ او پنچ شنبے نادے کوئٹہ چیمبر آف سمال ٹریڈر اٹ پریس کانفرنس آن تران کرسا کرے۔ داوخت آ پاکستان ایسوسی ایشن آف ایگزیبیشن انڈسٹری نا چیئرمین محمد خورشید برلاس، کوئٹہ چیمبر آف سمال ٹریڈر اینڈ سمال انڈسڑی نا صدر ولی محمد، سید عبدالخالق آغا، فہد برلاس وایلوفک ہم ساڑی ئسر۔ اوپارے کہ زرکاری بورڈ رئیل اسٹیٹ سیکٹر اٹ بلوچستان اٹ زرکاری نا بھاز وارخواہی ارے‘ داڑے پوسکن وڑ انا ہنکینی اسکیم جوڑکرسا نئے بیرہ مخلوق ءِ اُرا فراوان کننگ مریک بلکہ تعمیرات نا بشخ اٹ دا رد اٹ جوان بزنس ہم مننگ کیک۔ بلوچستان ءِ جوان ہننگ نا گرج ءِ۔ داڑے شونداری وزرکاری نا جوان وارخواہی ارے۔ صوبہ ٹی مائننگ کشت وکشار‘ لائیواسٹاک، فشریزنا بشخ اٹ کاریم کننگ ناگرج ءِ‘ دا بابت گام گیج کننگ انگ ءِ۔ بلوچستان زرکاری بورڈ ءِ گچین کارکڑد آ حکومت پاکستان ناکنڈآن ایوارڈ ہم تننگانے‘ نن زرکار آتا آسراتی و راہشونی کن کوشست کننگ اٹی ان۔

(آن لائن)