بنجائی بجٹ اٹی زرگزرانی سوگوی اصلاحات آتا بنداو تخنگک‘بلال اظہر کیانی

اسلام آباد:  وزیراعظم نا رابطہ کار زرگزران و توانائی بلال اظہر کیانی پارینے کہ پوسکن آ مالی سال انا بنجائی بجٹ اٹی ہندن ءُ اصلاحات آتا بنداو ءِ تخنہ ہراڑان ملک اٹی زرگزرانی سوگوی بریک، کشت وکشار، انفارمیشن ٹیکنالوجی، زرکاری ءِ مون آ دننگ و کاروبار کن سازگار چاگڑد نا فراوانی حکومت نا اولیت آتیٹی اوار ءِ، تدوک آ حکومت نا دور اٹی دنیا نا 24 می بھلا زرگزران ءِ 47 می پوزیشن آ سرکرسا ادارہ غاتے خورک کننگا۔ پنچ شنبے نادے آ داڑے پریس کانفرنس آن تران کرسا اوپارے کہ اینو ملک اٹی زرگزرانی و سفارتی پڑ آ ہرامشکل آتون مون تننگ ءِ او مسکوہی حکومت نا ہیبدار پالیسی تا بھرم ءِ، ساڑی حکومت تدوک آ سواسال اٹی زرگزرانی و سفارتی حالیت آتے گچین کننگ نا کوشست کرے۔ غٹ آن مست حکومت آئی ایم ایف تون ہیت انا بناءِ کرے۔ تدوک آ حکومت آئی ایم ایف پروگرام اس چلیفنگ اٹ بے سہب مس، ہراتم پروگرام دُوارہ بناکرے تو اودے لتاڑنگ نا کوشست کننگا۔ اوپارے کہ حکومت اٹ بننگ آن پد نن زرمبادلہ نا کوڑی تیٹی سوگوی اتوئی ئسک۔ بزغر پیکج نا کمک اٹ 18 سد ارب روپئی جاری کننگا۔ داسال اِرا کروڑ ہفتاد ءُ دو لکھ میٹرک ٹن خولم ودی مس۔ ننا حکومت دنیا نا ایلو ملک آتیا ہنسا تعلقداری تے بحال کرے۔ 2022 اٹی ننے سفارتی کہول آ تنیا کننگ نا کوشست کننگا۔ نن کرار کرار آ ملک ءِ دا حالیت آتیان کشنگ نا کوشست کننگ اُن۔ بلال اظہرکیانی پارے کہ 2018 ٹی ہراتم (ن) لیگ حکومت ءِ ہلاہنا تو شرح نمو 6.1 درسد ئسک۔

(اے پی پی)