کوئٹہ، قمبرانی روڈ آ سم کاری، بی این پی راہشون موسیٰ بلوچ نا ایلم زوال

کوئٹہ: کوئٹہ نا علاقہ قمبرانی روڈ آ سلہہ بند آتا سم کاری آن بی این پی نا بنجائی لیبر سیکرٹری نا ایلم زوال مس۔ سرجم حوال آتا رد اٹ کوئٹہ نا علاقہ قمبرانی روڈ آ کشمیر آباد اٹی سلہہ بند آتا سم کاری آن سعید احمد بلوچ پنی ءُ بندغ اس زوال مس، خونیک نرنگ اٹ سرسہب مسر۔ لاش ءِ ضابطہ نا کارروائی آن پد وارث آتا دوٹی تننگا۔ زوال مروک بلوچستان نیشنل پارٹی نا بنجائی لیبر سیکرٹری موسیٰ بلوچ و بنجائی کونسل نا باسک فیض اللہ بلوچ نا ایلم ئسکہ۔ بلوچستان نیشنل پارٹی نا سروک سردار اختر جان مینگل پارٹی نا بنجائی لیبر سیکرٹری موسیٰ بلوچ نا ایلم نا خون نا مذمت ءِ کرسا پارینے کہ اسہ وار ولدا ٹارگٹ کلنگ نا بنا مسنے، راجی رابطہ نا ویب سائٹ آ تیان کلہو اٹی سردار اختر جان مینگل پارے کہ اسہ وار ولدا ٹارگٹ کلنگ بنا کرینے، و بلوچستان نیشنل پارٹی نا ورکرآتے شست کننگ انگ ءِ۔ بی این پی نا بنجائی لیبر سیکرٹری موسیٰ بلوچ نا ایلم سعید احمد بلوچ نا کوئٹہ ٹی خون مس، ہرانا نن ترند انگا لوز آتیٹی مذمت ءِ کینہ۔ دا ر داٹ بلوچستان نیشنل پارٹی نا کنڈ آن سریاب روڈ آ لاش اتون اوار برانز کننگا۔ برانزی تتون اسسٹنٹ کمشنر سریاب سرسہب مذاکرات کرے اوکان پد دھرنا ءِ چٹفنگ نا پڑو کننگا۔ دھرننا غان پارلیمانی لیڈر ملک نصیر احمد شاہوانی، سینٹرل کمیٹی نا باسک و ضلعی صدر غلام نبی مری، ایم پی اے اختر حسین لانگو، احمد نواز بلوچ، سینٹرل ایگزیکٹو کمیٹی نا باسک حاجی ولی محمد لہڑی ضلعی سینئر نائب صدر ملک محی الدین لہڑی ضلعی ڈپٹی جنرل سیکریٹری ڈاکٹر علی احمد قمبرانی ضلعی فنانس سیکریٹری میر اکرم بنگلزئی ضلعی ہیومن رائٹس سیکریٹری پرنس رزاق بلوچ ضلعی پروفیشنل سیکریٹری میر مصطفی سمالانی و ایلوفک تران کریر۔ اوفک پاریر کہ سازش اسے نا رد اٹ اسہ وار ولدا بے ایمنی نا واقعہ غاک مننگ اٹی ءُ۔ و بی این پی نا کارندہ غاتے شست کننگ انگ ءِ۔ دا وڑ انا واقعہ غاک ننا جیرت ءِ شیف شاغنگ کپسہ۔ بلوچستان نیشنل پارٹی شہید آتا جماعت ءِ، ہرا مدام بلوچستان کن قربانی تیان تینے پدی توتنے۔ ترانکار آک خواست کریر کہ سعید احمد بلوچ نا خونی تے دمدستی دزگیر کننگے آخا تو نن سریاب روڈ آ دھرنا ءِ چٹفپنہ۔ اوکان پد ضلعی انتظامیہ و پولیس نا بڑزکو کہولی کمامدار آتا کنڈ آن برانزی تتون سرسہب مذاکرات کننگ، و دھرنا چٹا۔ اسسٹنٹ کمشنر سریاب نا رد اٹ دوبہ دار آتا دزگیری کن کانود نافذ کروک ادارہ غا کوشست کننگ اٹی ءُ۔ الس نا جان و مال انا رکھ انتظامی زمواری ءِ، داڑان ہچ گہس پدی مفنہ۔

(آن لائن)